Delegacioni i Kosovës i kryesuar nga Avni Arifi dhe në përbërje të Meliza Haradinaj, Alban Dermaku, Ardian Arifaj dhe Blerand Stavileci si dhe ambasadori i Kosovës në Bruksel, Bernard Nikaj, kanë zhvilluar një takim më shumë se tre orësh me zyrtarët më të lartë të Bashkimit Evropian.
Njoftimi i qeverisë së Kosovës, thekson se energjia, liria e lëvizjes, bashkëpunimi rajonal, janë disa nga temat për të cilat do të diskutohet në këtë fazë të takimeve. Delegacioni i Kosovës ka shprehur përkushtimin për dialog, më saktësisht për një dialog në funksion të të gjithë qytetarëve të Kosovës, të gjithë atyre që janë të kyçur në këtë proces. Grupi i ri negociator është i përkushtuar që procesi i dialogut të zhvillohet me transparencë të madhe në raport me qytetarët, përfundon noftimi.
Javën e kaluar, në mbledhjen e 12 janarit, qeveria miratoi propozimin që shefi i kabinetit të kryeministrit Ramush Haradinaj, Avni Arifi, të jetë shef i delegacionit kosovar në bisedimet Kosovë-Serbi me ndërmjetësimin e Brukselit.
Dialogu teknik Kosovë-Serbi në Bruksel, ndërmjetësuar nga Bashkimi Evropian, ka filluar në 8 mars 2011. /tesheshi.com/
