Sulmuesi polak ka rezultuar edhe një herë vendimtar, duke shënuar dy gola dhe duke i dhënë fitoren Bajernit të Mynihut në të parin takim të Bundesligës për këtë vit, të luajtur në kuadër të javës së tetëmbëdhjetë.
1-2 përfundoi e tërë ndeshja për miqtë ndaj vendasve të Hamburgut. Dhe, siç ndodh tradicionalisht, dueli i parë i vitit qe i vështirë për bavarezët. Por ndërsa vitin e shkuar pësuan një humbje të thellë prej Volfsburgut, ata ia dolën ta nisnin këtë herë fazën e dytë të Bundesligës aty ku e lanë një muaj më parë: me fitore.
Në sfidën e luajtur mbrëmë, Levandovski e kaloi Bajernin në epërsi në minutën e 37-të. Por një autogol i Alonsos tetë minuta pas nisjes së pjesës së dytë vendosi ekuilibër në fushë. I cili do të prishej po nga Levandovski, që shënoi një gol të dytë.
Në renditje Bajerni i Mynihut mbetet i pashqetësuar, duke mbajtur pafundësisht vendin e parë e duke e patur skuadrën ndjekëse më të afërt 11 pikë larg, ndonëse Borusia e Dortmundit ka një ndeshje më pak. /tesheshi.com/
