Në nëntë takimet e kësaj mbrëmjeje në kuadër të eliminatoreve të botërorit Rusi 2018, pa dyshim që ai më spikatësi është Itali – Spanjë.
Tre muaj më parë, më 27 qershor, në Euro 2016, Italia fitonte 2-0 ndaj Spanjës, duke i çuar në shtëpi kampionët e Europës.
Për Spanjën do të jetë një rast i mirë për të marrë hak, por diçka e tillë duket e vështirë në “Juventus Stadium”.
Si Italia dhe Spanja vijnë me dy trajnerë të rinj. Ventura dhe Lopetegui do të kenë sonte provën e tyre të vërtetë pasi i kanë kaluar lehtësisht ndeshjet e para. Italia fitonte 1-3 në fillim të shtatorit në transfertën e Izraelit, e Spanja luante tenis ndaj Lihtenshtajnit, duke fituar 8-0.
Ventura është shprehur kështu: “E rëndësishme është të kujtohet se pala pritëse fiton gjithmonë në Juventus Stadium… Jam me fat që kam një grup lojtarësh me cilësi të larta teknike dhe morale. Do të jetë (ndeshje) më shumë se e rëndësishme, por jo vendimtare dramatikisht. Ne duhet të luajmë për të fituar, pastaj do ta tregojë fusha rezultatin.”
Lopetegui, trajneri i spanjollëve, e ka bërë të qartë se në sulm do të jetë Diego Costa.
“E kemi studiuar takimin e fundit, dhe jemi gati të reagojmë nëse ky takim shkon në të njëjtën mënyrë,” ka thënë Lopetegui në konferencën e shtypit.
“Italia ka patur një stil të ngjashëm futbolli, nga Prandelli, te Conte e Ventura. Ka detaje të ndryshme, por sistemi bazë është mjaft i qëndrueshëm, në mbrojtje e sulm. Ata kanë lëvizje automatike që funksionojnë shumë mirë. Gjithashtu kanë Gigi Buffon-in, një legjendë e gjallë e historisë së futbollit në Itali.”
Krahas kësaj ndeshjeje, do të luhen dhe gjashtë të tjera: Austri – Uells, Moldavi – Serbi, Irlandë – Gjeorgji, Maqedoni – Izrael, Islandë – Finlandë, Turqi – Ukrainë. /tesheshi.com/
