Pak ditë para 2-vjetorit të tërmetit tragjik të 26 nëntorit 2019 në Tiranë, janë dhënë çelësat e parë për familjet e mbetura pa strehë. Ka ndodhur kjo në Vaqar, te Lagjja e re e Rindërtimit.
Plot 20 familje të kësaj zone janë strehuar në banesat e reja, kontributi i Fondacionit “Fundjavë Ndryshe”
Kryeministri Edi Rama deklaroi se i gjithë ky proces po ndryshon jetën e 33 mijë familjeve të goditura nga tërmeti i 26 nëntorit të dy viteve më parë dhe se kjo lagje në Vaqarr është një mundësi shumë e mirë për të gjithë komunitetin aty.
“Kjo është një lagje që i ka pranë të gjithë që krijon kushte të reja për të gjithë ata që dy vite me parë mbetën pa çati mbi kokë, dhe sot jo vetëm kthehen në shtëpi, që janë shumë më mira se ato që humbën dhe kanë më shumë seç kishin kur goditi ajo tragjedi e madhe. Janë bërë ndërhyrje që kanë prekur jo vetëm muret e apartamenteve por edhe fasadën dhe ambiente të mëdha.
Së shpejti do të hyjnë në shtëpi jo vetëm ata që janë në pritje në Ndroq e Zall Herr, apo në pika të tjera në Tiranës , si ajo e 5 Majit, që do jetë lagjia më urbanistikisht shembullore e Tiranës, dhe do u japë mundësinë banorëve që te jenë banorë të një hapësire tjetër urbane.
Po kështu edhe me Kombinatin , ku është bërë një punë goxha e mundimshme, në ditët e ardhshme do të hyjnë në shtëpi banorët e Bubqit. Po ashtu vijon puna në Thumanë, sot Laçi po bëhet një qytet nga e para. Në Lezhë , Kavajë, apo deri në Mirditë pranë Rrëshenit ku ka nje tjetër lagje që është drejt përfundimit.Të gjitha këto janë momente kurorëzimi të një përpjekje e cila ka zgjat 2 vite dhe duhet të mbajmë parasysh se në këto 2 vite jeta e vendit nuk ka qenë e lehtë, dhe kjo punë u shty në kohë për shkak të pandemisë”, tha Rama. /tesheshi.com/
