Ministrja e Shëndetësisë Ogerta Manastirliu, tha në Kuvend se Komiteti Teknik, në prag të festave të fundvitit, po vlerëson nëse masat do të shtrëngohen edhe në vendin tonë, ngjashëm si në vende të tjera evropiane, për shkak të rrezikut që paraqet varianti i ri Omicron.
“Jemi para festave ku presim të rriten shkëmbimet, ndërveprimet mes njerëzve, është situatë sa delikate e fluide për ecurinë e pandemisë.
Ekspertët tanë po vlerësojnë me shumë vëmëndje për masat që do të nevojitn. Sikurse ka vendosur komiteti nga 4 janari, të gjithë punonjësit në administratën publike supermarkete, qendra tregtare duhet të paraqesin kartën e vaksinimit, kartën e shërimit apo testin e antigenit cdo 5 ditë.
Jemi duke vlerësuar në dinamikë situatën për të siguruar planin e dimrit dhe rritjen e kapaciteteve për testimin dhe gjurmimin”, tha ajo.
Gruaja në krye të shëndetësisë shqiptare, i mëshoi dhe njëherë nevojës për t’u vaksinuar.
“Të gjithë atyre që për një arsye a një tjetër janë skeptikë doja t’ju thoja vetëm disa fakte nga situata në Shqipëri:
10 herë më shumë mundësi për t’u infektuar kanë të pavaksinuarit krahasuar me të vaksinuarit. Është e dhënë e përllogaritur nga ekspertët e shëndetit publik, nga të dhënat e përditshme të infektimeve në vend.
Mbi 90% e të shtruarve në spital janë të pavaksinuar. 2 dhe 3 herë më i ulët është numri i fataliteteve në kushtet e vaksinimit, duke krahasuar dy periudhat e peak-ut, siç ishte nëntori i vjetshëm dhe janar- shkurti i këtij viti.
Këto janë fakte. Nuk është opinioni im, janë fakte që raportojnë profesionistët”, argumentoi Manastirliu. /tesheshi.com/
