Këtë fundjavë udhëheqja e Partisë Socialiste do të ndryshohet mbi 70 përqind, ndërkohë që Edi Rama do të vendosë në kryesi njerëzit që deri tani i ka bashkëpunëtorët më të ngushtë.
Burime Brenda Partisë Socialiste mësohet se dy nga prurjet më të fuqishme në kryesinë e re që pritet të zgjidhet ditën e shtunë do të jenë Alfred Peza dhe Endri Fuga.
Deputeti socialist i zgjedhur në qarkun e Elbasanit, por që në zgjedhjet e ardhshme pritet të afrohet në kryeqytet dhe “truri” i propagandës në Kryeministri do të thirren nga kreu socialist për të ndërtuar atë që pritet të quhet “qendra e imazhit” në selinë rozë.
Ditën e shtunë, Asambleja e sapozgjedhur e PS-së në kongresin e 19 marsit do të zgjedhë kryesinë dhe sekretarët e rinj. Siç mësohet, Gramoz Ruçi pritet të zgjidhet në postin e Sekretarit të Përgjithshëm, që me statut rikthehet si figura numër dy e Partisë Socialiste, ndërkohë që drejtimi i Asamblesë pritet t’i lihet një figure të vjetër që sipas gjasave pritet të jetë profesor Pëllumbi, megjithëse ish-kreu i Kuvendit ka bërë të ditur se nuk i pëlqen të përfshihet në poste direkte.
Ndërkaq një pjesë e mirë e kryesisë aktuale janë të larguar automatikisht pasi nuk janë zgjedhur anëtarë të Asamblesë së re siç janë Ndre Legisi dhe Arben Isaraj. Arben Malaj gjithashtu nuk është zgjedhur në asamble dhe bëhet e ditur se pritet që të aktivizohen në këtë forum Artan Lame, por edhe disa drejtues të niveleve të dyta si Ogerta Manastirliu etj. Ditët e fundit ka një diskutim ndërmjet Ramës dhe Ruçit për çështjen e të vjetërve dhe raportit të tyre në kryesi, por edhe për mundësinë e afrimit të një grupi biznesmenësh si Koço Kokëdhima në kryesinë e re.
Me katapultimin e njerëzve të tij në kryesi, Rama krijon të gjitha mundësitë që ata të jenë pjesë e listës së re të deputetëve në zgjedhjet e ardhshme. Një nga këta padyshim pritet të jetë Endri Fuga. /tesheshi.com/
