Nga Shkëlzen Rrecaj
Për 18 vjet me radhë, familja Jashari i ka ripërtërirë një pjesë nga 55 viktimat e masakrës mbi të përgjatë luftimeve epokale me serbët, në mars të 1998-ës.
Sot kjo familje numëron 26 anëtarë, ku gjatë këtyre viteve kanë lindur 9 djem e 5 vajza, e ku që të gjithë mbajnë emrat e viktimave. Që do të thotë se brenda disa viteve do mund të jenë rehabilituar në të gjithë potencialin njerëzor të humbur nën plumbat serbe.
Në radhët e djemve janë dhe Shabani, Hamza e pa dyshim, Ademi.
Ky fakt bëhet me dije nga ciceroni i kompleksit muzeal “Adem Jashari”, Xhevat Imeri.
Ai ka që nga viti 2000 që pret e përcjell vizitorë, ku thotë se numri i tyre i përgjithshëm ka shkuar në rreth 11 milion.
Ndërsa si shënimin më pikant të lënë për nder të Jasharajve, ai veçon atë të ish-kreut të UNMIKU-it, Bernard Kushnerit: “Po të kishte çmim Nobel për liri, me siguri që ai do t’i takonte familjes Jashari”.
Interesant është fakti se përgjatë viteve të pasluftës, pozicioni i Jasharajve karshi zhvillimeve politike të Kosovës, ka qenë dhe mbetet mjaft diskret.
Ata kanë qëndruar larg mediave dhe pothuasje kanë heshtur për çdo lloj zhvillimi, sado delikat të ketë qenë.
Ndërsa për t’u angazhuar në politikë as aq bëhet fjalë.
Pra sot, mbetet një mister i madh fakti se përse Jasharajt qëndrojnë të heshur, të tërhequr, ndërkohë që fjala e tyre do ishte me shumë peshë.
Ata mbeten të vetmit ish-faktorë lufte – duke mbajtur dhe pozitën e kryesorit, gati-gati startit të UÇK-së – që kanë zgjedhur të mos jenë protagonistë në jetën politike.
Mjaft të thuhet se në parlamentin kosovar nuk ka asnjë deputet prej Jasharajsh, i afërt ose i largët me ta. /tesheshi.com/
