Rikthimi i vdekjeve nga COVID-i në Shqipëri, si dhe disa kurba infektimesh në rritje, siçe fundit me 25 në 24 orë, ka bërë që të vijnë apele ndërgjegjësuese nga specialistë të shëndetit, nga ata të cilët janë në vijën e parë të frontit.
Najada Çomo, Shefe e Shërbimit Infektiv në QSUT, tha se graviteit i sëmundjes vazhdon.
“Duhet të jemi realistë që ka persona të shtruar në spitalin infektiv që janë në gjendje jo të mirë shëndetësore dhe duke patur parasysh që kemi patur dy vdekje brenda pak ditësh tregon për vazhdimin e gravitetit të sëmundjes, paçka se shifra është nën 20. Por kjo shifër mund të zvogëlohet ose të shtohet në ditët në vijim. Masat e marra dhe pjesa e ruajtjes së distancimit janë elementë shumë të rëndësishëm për të ruajtur shifrat e ulëta të pacientëve të shtruar në shërbimin infektiv”, tha Çomo.
Nga ana tjetër, drejtuesja e Departamentit të Sëmundjeve Infektive në ISHP, Dr. Silva Bino, kërkoi rritje të ndërgjegjësimit edhe të të rinjve.
“Rritja e numrit të rasteve sidomos në Tiranë tregon se sa të kujdesshëm duhet të jemi. Është koha që të rinjtë të jenë të përgjegjshëm, që e gjithë popullata të jetë e përgjegjshme në mënyrë që të ruajmë distancën dhe rregullat e higjienës”, tha Bino.
Ndërsa Prof. Tritan Kalo apeloi për vetëndërgjegjësim nga qytetarët. “Sfida me COVID19 ende nuk ka përfunduar ndaj masat e vetëndërgjegjësimit dhe kujdesit ndaj vetes mbeten në fuqi sot, nesër dhe në të ardhmen”, tha Kalo. /tesheshi.com/
