Nga Blendi Gashi
Politika e jashtme e Kosovës konsiderohet si tërësisht e dështuar, dhe kjo pas stagnimit të njohjeve viteve të fundit dhe dështimit të anëtarësimit në UNESCO, në veçanti në dy vitet e fundit nën udhëheqjen e presidentit aktual Hashim Thaçi.
Por, për ta këndellur dhe rikthyer imazhin në politikën e jashtme së fundmi në krye të Ministrisë së Jashtme është emëruar nënkryetari i PDK-së Enver Hoxhaj i cili për tre vite, shkurt 2011 deri në dhjetor të vitit 2014 e drejtoi këtë dikaster qeveritar.
Por, shtrohet pyeja sa mund të jetë produktiv një njeri që për tre vite ishte në krye të kësaj ministrie dhe nuk la ndonjë gjurmë?
Analistët politik shprehen skeptik me emërimin e Hoxhajt si kryediplomat duke thënë se ai dështoi ta bëj punën e tij në mandatin e parë.
Ata nuk presin që me rikthimin e Enver Hoxhajt si shef i diplomacisë kosovare të përmirësohet imazhi i shtetit të Kosvës në rrafshin ndërkombëtar.
Analisti politik Albinot Maloku thotë se Ministria e Punëve të Jashtme e Republikës së Kosovës për fazën që po kalon shteti ynë dhe rrethanat gjeopolitike që po ndodhin në botë është dikaster shumë me rëndësi dhe një strategji e re e me suksese do të ishte e nevojshme.
Nisur nga kjo, Maloku thotë se rikthimi i Hoxhaj si ministër i këtij dikasteri qeveritar të Kosovës nuk e sheh si diçka premtuese, pasi thotë se gjatë mandatit të tij nuk ka treguar asnjë sukses e arritje, por më shumë ka pasur skandale e incidente brenda dikasterit që ka drejtuar.
“Ngritja dhe përparimi i këtij dikasteri qeveritar, që domosdoshmërish i nevojitet shteti të Kosovës, nuk e besoj se do të ndodh me Enver Hoxhajn si ministër. Stagnimi në numrin e njohjeve e në raste edhe regresi i politikës së jashtme të Kosovës, është gjendje faktike e cila nuk di si do të ndryshohet nga ai që veç u provua në këtë. Padyshim se rikthimi i Enver Hoxhajt në MPJ pa e menduar periudhën e tij me skandale e dështime është pjesa kryesore e këtij virusi që po e ndrydh shtetin e shoqërinë kosovare”, thotë Maloku, për tesheshi.com.
I pyetur se a pret shtim të njohjeve me rikthimin e Hoxhajt si kryediplomat, analisti Maloku nuk pret se do të ketë rritje të numrit të njohjeve, e as suksese në tentativat e anëtarësimit të Kosovës në instanca ndërkombëtare.
“Nga fjalimi i tij, gjatë takimit të Qeverive të Kosovës dhe Shqipërisë në Prishtinë nuk vërejta asgjë kreative në fushën e politikës së jashtme të Kosovës nën drejtimin e ministrit të rikthyer Hoxhaj”, thotë Maloku.
Edhe njohësi tjetër i rrethanave politike në vend, Faik Krasniqi thotë se riformatim në qeverisje s’mund të quhet rikthimi i Enver Hoxhaj në postin e ministrit të Jashtëm.
“Ka qenë i dështuar gjatë kohës kur ishte ministër, dhe do dështojë prapë. Kjo nuk është asgjë më shumë se riciklim. Riformatimet e tilla ndodhin vetëm sa për sy e faqe dhe nuk sjellin asgjë të re në qeverisje. Shkon një i dështuar dhe vjen një tjetër i dështuar Arnimet e tilla nuk e justifikojnë paaftësinë dhe mospunën e ekzekutivit, por as të ministrave përkatës, të cilët duhet të largohen nga pozitat që mbajnë, e jo të bartën nga një ministri në tjetrën”, thotë Krasniqi, për tesheshi.com.
S’është me rëndësi kush është kryediplomat i Kosovës
Drejtori i Instituti për Studime të Avancuara (GAP), Agron Demi thotë se aspak nuk është me rëndësi se cili politikan emërohet në pozitën e kryediplomatit kosovar.
“Me ministër të Jashtëm, Kosova dështoi të anëtarësohej në UNESCO dhe mori dy njohje, një liberalizim vizash dhe Kongresi Amerikan kërkoi inicimin e Partneritetit për Paqe të NATO-s me Kosovën. Andaj, pak rëndësi ka kush është në krye të MPJ, apo çfarëdo ministrie, madje nëse nuk ka fare ministra. Pasqyra më e mirë e këtij vendi ka qenë dhe mbeten qytetarët e tij, e jo përfaqësuesit politik”, ka shkruar në Facebook, Demi pas emërimit të Hoxhajt në pozitën e ministrit të Jashtëm.
Ndryshe, Republika e Kosovës sipas të dhënave të marra në webfaqen e MPJ-së ka siguruar deri më tani 111 njohje.
/tesheshi.com/
