Opozita kosovare e ka dhënë sinjalin e parë se do i përvishet sërish Asosacionit dhe Demarkacionit, pas sinjaleve po ashtu nga qeveria se do i rikthejë në axhendën e saj këto të çështje të mbetura ende pezull. Ishte kreu i VV-së, Visar Ymeri, i cili duke folur në emisionin “Click” të RTV21, e shpalosi dhe njëherë kundërshtinë e ashpër ndaj sidomos Demarkacionit, pavarësisht tezës së “mbetjes pa viza”, siç fort po i mëshon qeveria.
Ymeri tha se marrëveshja në fjalë do ishte kryer moti në rast se do ishte në rregull.
Kurse sa i përket komisionit të themeluar nga kryeministri Mustafa për matjen e territorit, drejtuar nga kryeakademiku Hivzi Islami, lideri i VV-së tha se “ky komisioni është një farsë e re për të legjitimuar këtë marrëveshje të dëmshme për vendin dhe se asnjë prej njerëzve, përjashto dy prej tyre janë jokompetentë”.
Ymeri, foli edhe për Asociacionin apo siç e quan VV “Zajednica”, ku paralajmëroi kundërshtim të fortë edhe për këtë çështje. “Po, sepse Kosova nuk duhet të ndahet në vija etnike. Asociacioni është kërkesë drejtpërdrejtë e Serbisë, jo e serbëve të Kosovës”.
Pashmagshëm Ymeri foli edhe për tensionet e ngritura me Serbinë, ku tha se pavarësisht kërcënimeve me luftë, pushtetarët po e gatuajnë recetën e njëjtë, pra po vazhdojnë dialogun me ta, për çka kërkoi ndërprerjen e bisedimeve.
“Me këto veprime po shpërblehet Serbia për kokëforësinë e saj edhe për ndërhyrjet e drejpërdrejta në territorin e Kosovës nëpërmes strukturave të saj. Fatkeqësisht, Serbia ka kontroll në 1/3 e territorit të Kosovës. Ka kontroll edhe në vendimet institucionale, nëpërmjet Listës Serbe”, tha ai.
Lidhur me kërcënimet serbe, Ymeri nuk la pa e ngacmuar presidentin Thaçi. Sipas tij, që pas “trenit”, kreu i shtetit ka ndryshuar gjuhë.
“Thaçi për interesa të veta poltike ka filluar të përdorë një diskurs tjetër prej atij që ka përdorë deri vonë dhe qëllimi i tij ka qenë që të marrë një karrikë shtesë në bisedimet e Brukselit. Prej sa shkoi në Bruksel, ai nuk po flet për luftë, nuk po flet as për ushtri dhe as për rrezikun nga Serbia, pra krejt çka ka pasur nevojë Thaçi është të shkojë në Bruksel”, deklaroi Ymeri.
Kreu i VV-së tha se Kosova duhet të bashkëpunojë vazhdimisht me Shqipërinë në rrafshin e sigurisë, atë ekonomik dhe në shumë rrafshe tjera, në mënyrë që shqiptarët të bëhen faktorë në Ballkan. /tesheshi.com/
