Preç Zogaj, kreu i “KOP”-it të ri në PD, Këshillit Euroatlantik, ka përcjellë thirrjen për të votuar kandidatët e PD-së në 14 maj, duke theksuar akuzueshëm frymën anti-amerikane dhe anti-perëndimore të përcjellë nga Berisha, tashmë në aleancë me Metën.
“Ne mendojmë se zhvillimet kritike dhe dramatike brenda Partisë Demokratike, sidomos këto dy vitet e fundit, që kur SHBA shpallën ‘non grata’ ish-Presidentin dhe ish-kryeministrin Sali Berisha dhe ai ndërmori pas kësaj përfshirjen e Partisë Demokratike në çështjen e tij, kanë krijuar një mjegullnajë të pazakontë në politikën dhe shoqërinë shqiptare, duke nxitur një retorikë anti-amerikane dhe anti-prendimore të panjohur gjatë këtyre viteve të demokracisë, majtas dhe djathtas, të trashëguar nga regjimi i Enver Hoxhës”, arsyetoi Zogaj.
“Ne u bëjmë thirrje demokratëve dhe qytetarëve shqiptarë të marrin pjesë masivisht, plot vetëdije, besim e largpamësi në zgjedhjet 14 maj për t’i dhënë votën kësaj alternative, për t’i dhënë mundësi PD-së të ringrihet, të bashkohet e të rritet si forcë fituese e ndryshimit”, ishte apeli i Zogajt.
Kujtomë se PD-ja zyrtare drejtohet nga Enkelejd Alibeaj, i komanduar pas dorëheqjes së Bashës, ndërkohë që ky i fundit ende nuk duket në horizont për një rikthim të mundshëm.
Çështja është se të dy, si Basha e si Alibeaj, të vetmit që kanë provuar apo po provojnë të zëvëndësojnë Berishën, kanë mangësi të lindur për të qenë figura imponuese politike me tipare lideri, të denjë për të mundur Ramën. /tesheshi.com/
