Kreu i PDSH-së, Menduh Thaçi pritet që të takohet të hënën pasdite me kryeministrin Zoran Zaev. Nuk bëhet e ditur arsyeja, mirëpo mendohet se do të flitet për përfshirjen e mundshme të partisë së tij në qeveri, edhe pse rezultoi humbësja e madhe e 11 dhjetorit.
Sipas informacioneve, marrëveshja mes tyre parasheh që PDSH me dy deputetë të përkrahë vendimet që kanë të bëjnë me reformat në sistemin e drejtësisë dhe në sfera të tjera; reformat që ndërlidhen me proceset e integrimeve euroatlantike dhe për çështjet që kanë të bëjnë me shqiptarët, sidomos për propozim-ligjin për përdorim më të zgjeruar të gjuhës shqipe.
PDSH gjithashtu, siç bëjnë të ditur nga LSDM nuk është e interesuar për të qenë pjesë e qeverisë, por ajo do të shprehë konstruktivitet për vendime që janë të rëndësishme për vendin.
Zaev garanci të tilla për përkrahje ka marrë edhe nga deputetët e Lëvizjes BESA, të cilët nuk u përfshinë në koalicionin qeverisës.
Javë më parë Menduh Thaçi është rikthyer në skenë falë një takimi formal me kundërshtarin e tij klasik në politikë, Ali Ahmeti. Thaçi tha se kjo bisedë ishte shumë e nevojshme, duke shtuar se nuk ka asgjë të jashtëzakonshme, porse thjesht bëhej fjalë për një komunikim të hapur dhe transparent mes pozitës dhe opozitës.
Ndërkohë, kujtojmë se menjëherë pas publikimit të rezultateve të zgjedhjeve që u mbajtën më 11 dhjetor vitin e kaluar, Thaçi pranoi humbjen por si fituese të zgjedhjeve e cilësoi Lëvizjen Besa, duke i ofruar bashkëpunim të plotë, qëndrim ky që Thaçi tashmë e ka ndryshuar. /tesheshi.com/
