Pasi u rihap për lutje më 24 korrik 2020, pas 86 vitesh, xhamia Hagia Sophia në Stamboll është vizituar nga më shumë se 3.5 milion njerëz që nga ajo ditë.
Imami i xhamisë, Ferruh Mustuer, tha se ai ka qenë imam për një vit aty, ndaj dhe ndihet shumë i lumtur dhe krenar.
“I jam mirënjohës Zotit që jam i nderuar nga kjo,” tha Mustuer.
Imami ndau informacione rreth vizitave në xhami.
“Që kur xhamia e Shën Sofisë u rihap për lutje, ajo është vizituar nga më shumë se 3.5 milionë njerëz deri më tani”, zbuloi Mustuer.
Ai shtoi se mysafirët vijnë nga të gjitha pjesët e botës.
“Çdo ditë ne jemi dëshmitarë se dy ose tre njerëz këtu bëhen muslimanë. Për shembull, ca të ardhur nga Kanadaja, të magjepsur nga bukuria e Shën Sofisë, vendosën të hulumtonin rreth Islamit. Pastaj erdhën dhe thanë: ‘Ne duam ta përqafojmë Islamin këtu’. Ka një numër të madh të çifteve nga të gjitha pjesët e Turqisë dhe Evropës që duan të kenë një martesë fetare në Hagia Sophia”, tha Mustuer.
Shën Sofia në Stamboll u rihap për ceremonitë fetare më 24 korrik 2020, pas 86 vitesh. Atë ditë, Hagia Sophia u hap për lutje me namazin e Xhumasë.
Shën Sofia shërbeu si kishë për 916 vjet, deri në marrjen e Stambollit, ndërsa kishte statusin e xhamisë nga viti 1453 deri më 1934, kur mori statusin e muzeut.
Më 10 korrik 2020, një gjykatë turke anuloi vendimin e ish -qeverisë së Turqisë, e cila i dha Shën Sofisë statusin e një muzeu më 24 nëntor 1934. Duke anuluar vendimin e përmendur, statusi i xhamisë iu rikthye Shën Sofisë.
Si një nga destinacionet turistike më të vizituara, Hagia Sophia është përfshirë në Listën e Trashëgimisë Botërore të UNESCO -s që nga viti 1985. /tesheshi.com/
