Është rikthyer në krye të rendit në Shkodë një drejtues model policie.
“Ju ishit forca ime! E drejta do dalë në dritë”, kështu pati deklaruar dy vite më parë Saimir Rrustemi, të cilin, pabesueshmërisht e akuzuan se kishte abuzuar me tenderin për rikonstruksionin e Komisariatit në Malësinë e Madhe(!).
E tashmë, dy vite nga ato akuza, Rrustemi është rikthyer sërish në të njëjtin post që mbante më herët, si Shef i Rendit në Shkodër.
Dy vite më parë, në korrik të 2022 pas një përvoje të gjatë me nder në radhët e Policisë, Rrustemi, së bashku me 13 efektivë të tjerë ra në pranga si i dyshuar në përfshirjen e disa tenderave për rikonstruksionin e Komisariatit në Malësinë e Madhe, në vlerën dy milionë lekë.
Qëndrimi i tij në qeli zgjati vetëm tre ditë pasi Gjykata aso kohe vendosi masën “arrest në shtëpi” për Rrustemin dhe më pas “detyrim paraqitje”. Teksa hetimet vijonin, nuk u gjet asnjë tender që ta implikonte atë. Tek e fundit, nuk ishte zyrtar në Rend, pra nuk merrej me aspekte burokratike.
Paradoksi vijoi më tej kur “delegua” në Dibër, në sallën operative në Drejtorinë Vendore të Dibër, një pozicion ky i ulët për një kryekomisar me grada dhe eksperiencë të gjatë pune.
Pas një viti në këtë pozicion, Rrustemi pësoi ngritje graduale në detyrë dhe u emërua Shef i Krimeve në Komisariatin e Vaut të Dejës. Gjatë drejtimit të tij në Vaun e Dejës u arrit “zbërthimi” i elementeve të ndryshme kriminale. E pas suksesit atje, Rrustemit i është besuar sërish vendi i vjetër i punës, si Shef i Rendit në Shkodër.
Vlen të kujtohet se përgjatë kohës kur Rrustemi u vu në pranga të shumtë ishin ata shkodranë të cilët protestuan jashtë ambienteve të Gjykatës. Ata kërkonin lirimin e menjëhershëm të tij, pasi e përshkruanin Rrustemin si një njeri të ndershëm dhe që ka qenë gjithmonë përkrah banorëve të zonës së Shkodrës.
Lidhur me arrestimin e tij aso kohe reaguan të revoltuar edhe gazetarët e kronikës, si në Shkodër dhe Tiranë të cilët kanë pasur një bashkëpunim të shkëlqyer me kryekomisarin dhe e vlerësonin si ndër efektivët më të trajnuar i cili është përballur me shumë grupe të rrezikshme kriminale.
