Pak më shumë se shtatë ditë pasi Julian Assange u lirua nga burgu në Britaninë e Madhe, duke i dhënë fund një beteje ligjore 13-vjeçare, faqja e internetit që ai themeloi, Wikileaks, publikoi dokumente sekrete nga Ministria e Informacionit e Izraelit ose dega e inteligjencës e qeverisë.
Në një postim në X, dikur Twitter, Wikileaks ndau një dokument sekret të inteligjencës izraelite nga nëntori 2023, i cili pretendon se përmend një plan izraelit për të dëbuar civilët nga Gaza në Egjipt.
Wikileaks thekson se autoritetet izraelite arritën në përfundimin se “një strategji e tillë do të sillte rezultate pozitive afatgjata”.
“Plani parashikon një proces me tre hapa që përfshin ngritjen e vendbanimeve me tenda në Sinai dhe hapjen e një korridori humanitar, e ndjekur nga ndërtimi i qyteteve në veri të Sinait nga të cilat nuk do të ketë më kthim”, shkruan ata me një lidhje me dokumentin e plotë.
Lufta në Rripin e Gazës ka vazhduar për gati nëntë muaj, pasi Hamas goditi Izraelin jugor. Përgjigja izraelite ishte e ashpër dhe është ende në vazhdim, me autoritetet izraelite që pretendojnë se nuk do të ndalen derisa të shkatërrojnë Hamasin
Në sulmet e ushtrisë izraelite në Gaza, mbi 35,000 palestinezë kanë vdekur deri më tani, nga të cilët 56 për qind gra dhe fëmijë. Dhjetëra mijëra të tjerë janë plagosur, ndërsa Izraeli përballet me kritika për shkelje masive të të drejtave të njeriut, evakuim të detyruar të civilëve, si dhe me disa vende që e akuzojnë për gjenocid.
Ju kujtojmë se Julian Assange, themeluesi i Wikileaks, një faqe që që nga viti 2006 ka publikuar një sërë dokumentesh konfidenciale të qeverive botërore dhe agjencive të inteligjencës, u kthye në Australi javën e kaluar pasi u pajtua me gjykatën dhe u deklarua fajtor sipas Aktit të spiunazhit të SHBA.
Për vite me radhë, SHBA-ja ka kërkuar ekstradim, gjyq dhe dënim drakonian për Assange për zbulimin e dokumenteve të klasifikuara dhe identitetit të zyrtarëve të inteligjencës amerikane, të cilat sipas saj rrezikonin jetën e tyre. /tesheshi.com/
