Nga Ylli Pata
Vendimi i Gjykatës së Tiranës për të rikthyer për hetim të ashtuquajturën dosje “CEZ” ka bërë që tani të kemi në fuqi dy dosje të mëdha politikisht proporcionale.
Nga njëra anë kemi dosjen “Habilaj” apo Tahiri”, ku i hetuar është ish-ministri i Brendshëm i PS-së, Saimir Tahiri, dhe nga ana tjetër dosjen “CEZ” ku akuzohen krerë të ish-qeverisë “Berisha” që nga ish-kryeministri, Sali Berisha dora vetë, me të birin e ca ministra nga pas.
Dosja “CEZ” u hartua nga mazhoranca, e cila ngriti një komision hetimor në Parlament. Ajo ka si bazë të saj denoncimin e ish-punonjësit të DIA-s, Romeo Kara, i cili ka dorëzuar letërkëmbimet ndërmjet ish-drejtuesve të CEZ me njëri -tjetrin, ku sipas tij implikohen ish-krerë të lartë të qeverisë.
Thelbi i dosjes janë dy elementë: lobimi i CEZ për të ngritur çmimin e shitjes së energjisë, si dhe marrja para zgjedhjeve të vitit 2009-s të 7 milionë euro cash nga një bankë e nivelit të dytë, e tërhequr nga Nuel Kalaj, një sipërmarrës nga Kosova. Kalaj ishte ndërmjetës mes qeverisë shqiptare dhe CEZ për të arritur shitjen e kompanisë shtetërore OSHE, që ndodhi në vitin 2009.
Komisioni hetimor i kryesuar nga Taulant Balla, akuzoi djalin e ish-kryeministrit, Shkëlzen Berisha, se ka ndikuar për të favorizuar rritjen e çmimit në dobi të CEZ. Por ç’ndodh tani që gjykata e Tiranës e ka kthyer çështjen për hetim.
Dosja “CEZ”, si rregull procedurial nuk kthehet më në Prokurorinë e Përgjithshme. Pra edhe nëse mazhoranca arrin të hënën të zgjedhë Kryeprokurorin e Përkohshëm, ai që emërohet s’ka punë fare me të. Dosja e CEZ rikthehet në duart e Prokurorit të Tiranës, Petrit Fusha, i cili firmosi mbylljen e saj.
Tani, prokurori i kryeqytetit, i cili me ndryshimet kushtetuese ka fuqi të plotë për të vepruar, është i deturuar t’ja japë për hetim dosjen një grupi tjetër dhe të ndjekë kërkesën e gjykatës.
Gjykata i ka kërkuar Prokurorisë që në hetimet e thelluara, do të duhet të thirren njerëzit e përmendur në dosje e që janë ish-Kryeministri Sali Berisha, i biri i tij, Shkëlzen Berisha, ish-ministrat e Energjisë dhe Ekonomisë, die Nuel Kalaj personi kyç në dosje dhe natyrisht krerët e CEZ nga Çekia.
Dhe natyrisht siç ndodh edhe me dosjen “Tahiri” apo edhe me dosje të tjera, në vend pritet të bëhet më shumë zhurmë politike sesa të lihet e lirë drejtësia të punojë.
Çdo pyetje në prokurori e politikanëve pritet të shoqërohet me debate e rrjedhje informacionesh, siç po ndodh me Saimir Tahirin që më shumë po hetohet nga panelet televizive sesa nga organi i akuzës. Prokuroria ka dy rrugë për të hetuar dosjen CEZ: të rihetojë dhe ta mbyllë atë për mosgjetje të një vepre penale, ose të gjejë shkelje të ligjit dhe të nisë arrestimet. Por të dyja vendimet duhet të kalojnë nga gjykata.
Shkurt, për një kohë të gjatë do të kemi në vend një “bombardim” të opinionit në lidhje me këtë dosje.
Kjo vjen nga përdorimi politik i drejtësisë në Shqipëri. Por natyrisht edhe nga precedent “Tahiri”. Nesë afera për të cilën akuzohet ish-ministri i Brendshëm do të lihet e qetë të hetohet pa zërin e lartë të opozitës, edhe mazhoranca me rastin “CEZ” do të detyrohej të bëntë të njëjtën gjë.
Nuk thonë kot, kush mbjell erën do të korrë furtunën! E cila pritet të përshkojë politikën shqiptare, të paktën nga fillimi i janarit, kur Donald Lu ka thënë se “do hamë peshq të mëdhenj”. /tesheshi.com/
