Bllokimi i Vetingut dhe nyja e Reformës në Drejtësi ka sjellë papritur rikthimin e fuqisë së Presidentit të Republikës dhe lojërat politike mbi postin numër një të shtetit shqiptar.
Partia Demokratike e konkretisht Lulzim Basha, pritet ta nxjerrë si “as nën mëngë”, kërkesën për President konsensual në zgrip të çadrës-protestë që tashmë po afron tek java e katërt e saj.
Siç i tha tesheshi.com një burim diplomatik, njerëz pranë opozitës kanë referuar si mundësi negocimi që posti i kreut të shtetit të hyjë në tavolinë si një zgjidhje garancie për zgjedhjet e ardhshme që PD i do të shtyra dhe do t’i vendosë në paketë të kërkesave për të dalë nga çadra.
Ish-kryeministri Berisha po lëviz shumë në Presidencë kohët e fundit duke zhvilluar madje edhe nga dy takime në ditë me zotin Nishani.
Ka gjasa që PD të ketë në paketën e saj si president konsensual pikërisht Bujar Nishanin, duke e argumentuar me marrëdhëniet e mira që Presidenti ka si me komunitetin ndërkombëtar ashtu edhe me një pjesë të mazhorancës.
PD mund ta ofrojë Nishanin si një figurë që i ka rezistuar presionit të Edi Ramës, për shqetësimet që opozita i ka ngritur si të rënda, ku përfshihen kanabizimi apo përplasjet me Gjyqësorin.
Presidenti i Republikës deri në zbatimin e Vetingut është kreu real i Këshillit të Lartë të Drejtësisë dhe qeveris si gjykatat ashtu edhe Prokurorinë në këtë periudhë kaotike tranzicioni, ku gjyqtarët po lirojnë njëri pas tjetrit figurat më të larta të krimit.
Ndërkaq, Presidenti i Republikës pritet që të marrë në dorë organet e Drejtësisë, që nga nisja e koordinimi i Vetingut, në organizimin dhe menaxhimin e themelimit të Këshillit të Lartë të Gjyqësorit, Këshillit të Lartë të Prokurorisë, e më pas Byronë Kombëtare të Hetimit dhe Prokurorinë Speciale.
Por Presidenti i ri, edhe nëse zgjidhet në prill apo në maj, ai nuk do të marrë deyrën para muajit korrik, kohë kur Bujar Nishani do të zhvillojë ceremoninë zyrtare të dorëzimit të detyrës.
Deri atëherë Nishani do të vazhdojë të mbajë drejtimin e Këshillit të Lartë të Drejtësisë, një institucion endemik, në luftë të hapur me mazhorancën dhe me një marrëdhënie të ngushtë me opozitën.
Nga ana tjetër LSI-ja po lufton fort që të marrë postin numër një të shtetit shqiptar pasi e di mirë që kryeministrin është vështirë për të mos thënë e pamundur ta ketë të tijin.
Dhe kjo duket jo thjesht një lëvizje taktike e Ilir Metës, por një nga paketat strategjike të tij të menduar prej kohësh.
Nuk është e rastësishme që prej dy vjetësh është hapur nga njerëz të LSI-së një faqe Facebook-u: “Monika Kryemadhi për Presidente”.
Dhe bashkëshortja e kreut të Kuvendit, një politikane me përvojë dhe e famshme për energjinë e saj reaktive në aksion, ka shumë vite që qëndron nën hije duke shpërndarë në publik më shumë profilin e saj si grua, bashkëshorte dhe si nënë, sesa si politikane.
Ka gjasa që Meta të negocojë fort për këtë emër, por që deri tani ende asgjë nuk është bërë publik, megjithëse mes LSI-së dhe PS-së ka negociata frenetike të cilat mbahen në sekret të plotë.
PS-ja nga ana e saj tashmë e ka konfiguruar kandidaturën e saj, që është Mimi Kodheli, e cila duket se gëzon mbështetjen brenda PS-së dhe në disa qarqe diplomatike.
Dhe me gjasë, zgjedhja e Presidentit të ri të Republikës do të kthehet në një betejë të fortë dhe nuk do të jetë një “shëtitje” e lehtë në Kuvend për PS-në dhe vetë mazhorancën.
Sipas lojrave që po luhen underground kemi një betejë të fortë mes një burri që është Bujar Nishani dhe dy grave: Monika Kryemadhin dhe Mimi Kodhelin. /tesheshi.com/
