Nga Ylli Pata
Zhvendosja ka ndodhur më 1 prill, pikërisht në ditën e famshme të koalicionit mes Ilir Metës dhe Edi Ramës në vitin 2013.
Bamir Topi, “djali plangprishës” i Sali Berishës është rikthyer në selinë e vjetër blu, atë që Lulzim Basha e braktisi për të hyrë në Shtëpinë Qendrore të Ushtrisë Popullore, SHQUP, një ankronim me të cilin luhet dhe politikisht në ligjërimin e mazhorancës, kur ja ka ngenë dhe të shpotisë opozitën.
Vendimin e ka marrë Erion Veliaj, padyshim edhe me “izmën” e Edi Ramës.
Në të djathtë të portës qendrore ndodhej një tabelë ngjyrë floriri ku shkruhej: “Agjencia e Konsumatorit” e vendosur aty nga Lulzim Basha.
Një polic bashkiak qëndronte në katin e parë dhe kur e pyet për Frymën e Re Demokratike, të thotë: “në katin e tretë”.
Në hyrje, një furgon dhe disa punëtorë po shkarkojnë karrige dhe tavolina.
Në hollin e katit të tretë gjithçka është fringo dhe pastër.
Në të djathtë, në një zyrë e hapur pas skrivanisë ndodhet Sali Shehu, drejtues i rëndësishëm i FRD-së dhe ish-deputet i njohur i Partisë Demokratike.
Shehu, pasi të mirëpret ngrohtë thotë se “presim urime pasi kemi 4-vjetorin e themelimit të partisë”.
Është mjaft entuziast për selinë e re për të cilën thotë se nuk është thjesht një ndërtesë.
“Është një simbol i rëndësishëm pasi ne jemi kthyer në shtëpinë që na takon, ajo e së djathtës shqiptare”.
E pyes zotin Shehu në lidhje me ftesën që është bërë nga Sekretari i Përgjithshëm i PD-së, Arben Ristani që FRD-ja të shkojë në koalicion me PD-në.
“Nuk i takon zotit Ristani, por kryetarit Lulzim Basha. Ne sot kemi festën dhe e kemi ftuar personalisht dhe zyrtarisht, por deri tani nuk ka kthyer përgjigje”.
“Po të tjerët kanë kthyer?”, e pyes.
“Për shembull, kryeministri Edi Rama ka konfirmuar pjesëmarrjen”, thotë Shehu.
FRD është aleate me PS-në që prej zgjedhjeve lokale të 21 qershorit.
Pyes për zyrën e vjetër, që ka qenë ikonë në selinë blu, pikërisht studioja e punës së Doktor Berishës, që ka qenë e veshur me mister edhe si pasojë e vendodhjes strategjike, por edhe nga magnetizmi i liderit historik të PD-së.
Sali Shehu buzëqesh, thërret një vajzë që punon për mediat dhe lajmëron një zonjë që ndodhet në zyrën përballë që t’i japë çelësat.
Ecim në korridorin e gjatë dhe zyrtarja e shtypit shtyn derën e rëndë mitike.
Zyra hapësinore ishte ndryshuar totalisht. Në skrivaninë ku ka qëndruar ish-presidenti dhe ish-kryeministri tashmë është ulur Alfred Cako, ish-deputeti ballist që sot është drejtori i gazetës “Fryma e Re”.
Ndërsa në një tryezë pak më tutje, ishte ulur gazetarja veterane Zamira Koleci, që tani punon si konsulente informimi pranë FRD-së. Por asnjëri nga të dy nuk ndodhej në zyrë. Më tej ishte vendosur një podium për deklarata me skenë adezivët e FRD-së.
Pra, zyra e vjetër e dojtor Berishës ishte lënë për mediat.
Bamir Topi, kryetari i partisë ndodhej në një takim për të organizuar eventin e festës.
Ish-presidenti i Republikës është vendosur në një zyrë të vogël në katin e tretë, që dikur ka qenë zyra e Sekretarit të Përgjithshëm të Partisë Demokratike, Ridvan Bodes.
“Po zyra e vjetër e nënkryetarit të PD-së Bamir Topi çfarë është tani”, pyes shoqëruesen, e cila duke buzëqeshur thotë: “Atje është vendosur Gazmend Oketa, Sekretari i Përgjithshëm i FRD-së”.
Ish-ministri i Mbrojtjes ndodhej në vendin ku do të organizohej festa e 4-vjetorit. Siç duket, ndaj kishte mjaft qetësi.
“Po pse vetëm katin e tretë”, pyes drejtuesin e lartë të FRD-së, Sali Shehu, i cili përgjigjen e ka në majë të gjuhës: “Do të zbresim avash-avash dhe do të marrim të gjithë godinën, siç do të zëmë dalëngadalë vendin tonë në zemrën e së djathtës shqiptare, vend që na takon plotësisht”.
Pas largimit të PD-së në selinë e SHQUP-it, Bamir Topi, që ndodhej në zyra me qera shumë pranë ish-selisë së vjetër, ia “vuri syrin” menjëherë. Dhe siç mësohet, kërkesa për t’u rikthyer në shtëpinë e vjetër ka qenë primarja drejtuar qeverisë. Ndoshta edhe ndër kryesoret pas hyrjes në koalicionin vendor.
Politika shpesh është simbolikë dhe traditë, pasi luan me asocacionet vend dhe kohë.
Bamir Topi, në strategjinë e tij për të zënë një vend të së djathtës tradicionale, ka zgjedhur pikërisht këtë lëvizje si një komunikim me elektoratin e vjetër të së djathtës. Sidomos në Tiranë…
/tesheshi.com/
