Greqia do të lejojë tifozët të ndjekin ndeshjet e futbollit të kategorisë së parë nga 13 shkurti, dy muaj pasi klubet u urdhëruan të luanin përpara tribunave të zbrazëta pasi dhuna gjatë një ndeshje volejbolli la një polic të plagosur rëndë. Disa ditë më vonë polici vdiq.
Në Greqi, zënkat mes tifozëve të futbollit janë të zakonshme në tribuna dhe jashtë stadiumit para ose pas ndeshjes, me autoritetet që janë përpjekur ta zhdukin prej vitesh, raporton Reuters.
Qeveria konfirmoi rikthimin e tifozëve në tribuna, por njoftoi gjithashtu se rregullat do të jenë më të rrepta. Nëse gjatë ndeshjes ndodh dhunë, do të shqiptohen gjoba të rënda dhe klubet do të urdhërohen që ndeshjen e radhës ta luajnë pa tifozë.
Kamerat e detyrueshme në stadiume dhe salla
“Në rast se një objekt i rrezikshëm bie në fushë, fusha do të mbyllet për ndeshjen e radhës”, tha Giannis Vroutsis, zëvendësministër i Kulturës dhe Sportit. “Detyra e shtetit është të mbrojë sigurinë”.
Duke filluar nga muaji i ardhshëm, klubet e futbollit dhe basketbollit do të duhet të kenë kamera vëzhgimi të instaluara në tribuna dhe përgjatë fushave në mënyrë që të kenë tifozë në ndeshjet e tyre, tha Vroutsis.
Duke filluar nga 9 prilli, tifozët do të duhet gjithashtu të identifikohen përmes aplikacionit celular të qeverisë greke në hyrje të një stadiumi apo salla sportive për të ndjekur një ndeshje. /tesheshi.com/
