Për shkak të rritjes së numrit të rasteve të infektimit me virusin korona, organizatorët e garës së çiklizmit Giro d’Italia vendosën të shtrëngojnë rregullat gjatë testimit, duke përfshirë edhe mbajtjen e detyrueshme të maskës mbrojtëse.
Deri më tani, gjashtë çiklistë e kanë përfunduar Giro-n para kohe për shkak të një testi pozitiv për Covid-19. Mes tyre është belgu Remco Evenepoel (Soudal-QuickStep), i cili ishte në krye pas nëntë etapash, raporton Reuters.
Të dielën, Evenepoel fitoi etapën e nëntë dhe rifitoi kryesimin në renditjen e përgjithshme, të cilën e mbajti nga etapa e parë në të tretën. Mirëpo, gjatë mbrëmjes ai ka kryer një test rutinë për Covid dhe ka rezultuar pozitiv, ndaj i është dashur të heqë dorë nga gara, e cila do të zgjasë edhe dy javë të tjera.
Para tij hoqën dorë pesë si ai.
“Më vjen vërtet keq që largohem nga gara”, tha Evenepoel në një deklaratë. “Si pjesë e protokollit të ekipit, bëra një test rutinë, i cili fatkeqësisht doli pozitiv”.
L’Equipe franceze publikoi deklaratën e mjekut të Soudal-QuickStep, Yvon van Mol, i cili tha:
“Ne nuk e dimë se cilat janë pasojat për sistemin e tyre kardiak, por detyra jonë si mjekë është të parandalojmë çiklistët me Covid-19 që të garojnë,” tha ai. Sipas tij, Covid-19 ka potencialin të lërë pasoja afatgjata.
“Mungesa e njohurive të thella për të, duke pasur parasysh shfaqjen e fundit të virusit, do të thotë se është më mirë të jesh i sigurt”, shtoi Van Mol. /tesheshi.com/
