Opozita në Shqipëri i është rikthyer serialit të akuzave ndaj qeverisë lidhur me kanabisin. Ditë pasi debati politik, gjithashtu dhe akuzat, kanë qenë të përqëndruara në të tjera çështje, PD doli këtë të enjte me një denoncim të radhës lidhur me atë që ajo e konsideron kanabizim të frikshëm të vendit, duke iu referuar sasisë së tonelatave të drogës që po kapin autoritetet fqinje çdo ditë, sigurisht të ardhura nga Shqipëria; si dhe shkrimeve në mediat botërore prestigjoze të cilat sipas saj evidentojnë të njëjtën gjë.
Ishte kreu i Departamentit të Rendit dhe Sigurisë në PD, Enkelejd Alibeaj, ai që përcolli të dhënat për opinionin si një akuzë ndaj kabinetit “Rama” dhe personalisht atij vetë:
“1 ton në Greqi dhe 1 ton drogë në Itali. Bëhet fjalë për sasinë e kapur nga policia. Kur raporti është në 10 ngarkesa, policia fqinje arrin të ndalë vetëm njërën, përfytyroni sa drogë shqiptare ka kaluar këto ditë në Greqi dhe në Itali. Ndërkohë, Edi Rama e mohon, thotë se nuk ka drogë, nuk kemi problem me drogën, edhe pse mbarë Europa është e shqetësuar, media italiane, greke, gjermane dhe BBC japin alarmin për hashashin shqiptar që po mbulon vendet e tyre”, u shpreh Alibeaj, që më pas shtoi se “Droga dhe përfshirja e qeverisë në këtë biznes kriminal është një realitet i frikshëm, që po inkriminon shoqërinë, po pushton rininë e shkollat, po shkatërron imazhin e vendit tonë dhe është një prej mureve që po pengon integrimin europian të vendit. Vetëm një njeri ende nuk e kupton këtë gjendje të rëndë. Ky është Edi Rama, i cili duke e mohuar drogën po vetëshpallet si kumbari i saj.”
Gjithnjë, këtyre lloj akuzash, qeveria i është përgjigjur duke i treguar statistikat e Guarda Di Finanza-s, që sipas saj tregojnë të kundërtën; por kjo nuk e ka lëkundur edhe bindjen e përgjithshme të opinionit se kanabisi po bën kërdinë nën këtë qeveri. /tesheshi.com/
