Nuk ka më mirë se ta nisësh vitin me një fitore, aq më tepër kur përballë ke rivalin e përbetuar. Sampdoria e ka bërë një gjë të tillë, teksa ka dalë fituese në sfidën ndaj Xhenovës, në një ndeshje të mbyllur 3-2 për të.
Aromën e ndeshjes derbi e ofruan së pari tifozët e të dyja skuadrave, që hodhën fishekzjarre në fushë si për të paralajmëruar një duel vërtet të zjarrtë e emocionues.
Ndeshjen e nisin shkëlqyeshëm futbollistët e Sampdorias, që realizojnë dy herë në pjesën e parë me anë të Sorianos dhe Ederit. Ekipi i drejtuar nga Montela shkoi kështu me një epërsi prej dy golash në dhomat e zhveshjes pas 45 minutave.
Goli i tretë për Sampdorian erdhi menjëherë pas fillimit të pjesës së dytë. Soriano shënon përsëri në minutën e 49-të.
Të gjendur në humbje të thellë, lojtarët e Xhenovës nuk u shkurajuan, por filluan të sulmojnë pareshtur, duke arritur ta ngushtojnë rezultatin me dy golat e Pavolettit. Kaq mundën të bënin djemtë e Gasperinit, që në fund e lanë fushën kokulur.
Sampdoria arriti një sukses të rëndësishëm, dhe u ngjit në vendin e 10 të renditjes së kampionatit italian, me 23 pikë, ndërsa kuqeblutë u zhytën akoma më thellë në krizë, e janë vetëm 2 pikë larg Frosinones, që gjendet në zonën e rënies nga kategoria. /tesheshi.com/
