Milo Gjukanoviç do të rikthehet fuqishëm në Mal të Zi pasi do të kandidojë për President të Republikës më të re anëtare e NATO-s.
Pushtetari më jetëgjatë në Europë, madje edhe më shumë se Vladimir Putin, pritet të rikthehet pas një pushimi vetëm dyvjeçar, ndërkohë që prej vitit 1991 ka qenë edhe President edhe Kryeministër i Malit të Zi.
E përditshmja e Podgoricës, Pobjeda, thekson se një forum i lartë i Partisë Demokratike të Socialistëve të Malit të Zi ka arritur në përfundimin se nuk ka kandidat tjetër përveçse Milo Gjukanoviçit.
Zgjedhjet presidenciale pritet të zhvillohen në pranverën e vitit 2018, ndërkohë që opozita proruse ende nuk ka dalë me kandidat të sajin.
Filorusët kanë nisur menjëherë të sulmojnë pakicat kombëtare, që i shohin si aleatë kryesorë të Milo Gjukanoviçit.
Në Sputnik, megjithatë, analisti Sergej Sekuloviç thekson se opozita malazeze është totalisht e shkatërruar dhe nuk ka arritur asnjëherë një platformë të përbashkët.
“Konfliktet e opozitës janë sigurisht më të dukshme dhe shkatërruese nga perspektiva e votuesit të opozitës, sepse në njërën anë opozita kronikisht dështon të fitojë zgjedhjet, dhe nga ana tjetër, mënyra e kësaj kundërshtie dhe konflikti i brendshëm nuk rijon një linjë të qartë. Opozitës i kthehet si boomerang çdo kauzë dhe DPZ mban kontrollin e lojës”, thotë Sekuloviç. /tesheshi.com/
