Nuk e kemi parë këto kohët e fundit për shkak të dëmtimit, por Zlatan Ibrahimoviç po bëhet gati të rifutet në fushën e blertë të futbollit, e në sytë e të gjithë botës.
Por suedezi nuk është nga ata që hyn si gjithë të tjerët. Gjithnjë merr me vete një porcion protagonizmi, gjithnjë pëlqen të turbullojë ujërat, e të bëjë deklarata të forta.
“Do të iki nga futbolli si të dua unë, edhe sikur të më duhet të eci mbi ujë”– ka qenë batuta e rradhës që 35-vjeçari ka thënë, në intervistën dhënë për Sky Sport, përballë gazetarit ish futbollist, Tierry Henry.
Duke njoftuar rikthimin në fushë, Ibrahimoviç deklaroi se objektivi është titulli kampion me Mancester Junajtid, si edhe rikthimi protagonist në skuadër, pavarësisht dëmtimit.
“E dija që do të rikthehesha shpejt, sepse kisha një sfidë përpara. E kur kam sfida, nuk pyes për asgjë, këtë e di edhe fiziku im. Ka qenë dëmtimi më i gjatë që kam pësuar. E di që shumë më kanë quajtur të mbaruar, apo shumë të vjetër, por kjo gjithnjë më ka dhënë energji dhe ju e dini si kam luajtur kudo. Do të largohem nga futbolli siç kam hyrë, jo duke çaluar. Do të largohem, siç dua unë të largohem”- ka thënë Ibrahimoviç për kohën e rikuperimit të të cilit, mjekët nuk e fshehën habinë, duke u marrë gjatë me studimin e metabolizmit të tij.
Të gjithë e presin me dëshirë rikthimin e gjigandit suedez, i cili pavarësisht kalimit të viteve, nuk është ndalur së shënuari për skuadrat ku ka luajtur, si edhe për kombëtaren e vendit të tij.
Që do të krijojë probleme menjëherë sa të hyjë në skuadër nuk diskutohet, por me një trajner si Murinjo, që argëtohet me tipa të vështirë, do të ketë kuriozitet, për përfundimin e “shfaqjes”. /tesheshi.com/
