Pas një kohe të gjatë, më saktë që pas humbjes si kandidat për Durrësin në zgjedhjet lokale të 2011-ës (bëri lapsusin e famshëm do “reformoj diellin”), i është rikthyer debatit politik e publik, Ferdinant Xhaferi. Në një shkrim të tij, ai ka lëshuar kritika kundrejt kreut të PD-së, Lulzim Basha, në një përpjekje për të analizuar humbjen e rëndë në zgjedhjet e fundit lokale.
“…PD-ja e Lulzim Bashës ka gabuar dhe vazhdon të gabojë, sepse nuk ka kuptuar si domosdoshmëri themelore të saj zbatimin e principit hegeljan, që na bën me dije se nuk mund të konsolidohet një komunitet politik pa ndërtuar më parë një komunitet moral. Brenda këtij moraliteti, PDja duhej të ishte më objektive dhe të ngrihej në nivelin e kandidatëve të saj për të pranuar se në Tiranë, Fier apo diku tjetër u mbajtën zgjedhje”, shkruan kështu Ferdinant Xhaferi në trajtesën e tij kritike, sa ndaj pushtetit aktual e sa ndaj opozitës, pjesë e së cilës është.
