Bashkëthemeluesi i OpenAI, Sam Altman do të kthehet në postin e tij si CEO, vetëm disa ditë pasi bordi i tij e shkarkoi atë, njoftoi kompania.
Kjo kthesë erdhi pasi shkarkimi i Altman të premten shkaktoi pakënaqësi të punonjësve, të cilët me anë të një letre të hapur paralajmëruan se të gjithë do të largoheshin nëse Altman nuk rikthehej në detyrë, raportoi BBC.
“Mezi pres të kthehem në OpenAI”, ka postuar Altman në rrjetet sociale.
Përveç kthimit të Altman në postin e CEO, OpenAI ra dakord edhe për rindërtimin pjesërisht të bordit të drejtorëve që e shkarkoi atë.
CEO i Microsoft, Satya Nadella më parë bëri thirrje për “ndryshime radikale” në OpenAI pasi bordi shkarkoi Sam Altman.
Nadella tha se “diçka duhet të ndryshojë” në kompani, por ai nuk dha hollësi se çfarë donte të thoshte, as nuk përjashtoi mundësinë që Microsoft të marrë një vend në bord.
Microsoft është investitori më i madh në kompaninë OpenAI që lançoi mjetin e inteligjencës artificiale ChatGPT.
Pasi Altman u shkarkua nga bordi i drejtorëve të OpenAI tre ditë më parë, Greg Brockman, bashkëthemeluesi dhe ekzekutivi tjetër i kompanisë, gjithashtu u largua nga kompania.
“Bordi nuk ka më besim në aftësinë e tij për të vazhduar të udhëheqë OpenAI (ChatGPT),” tha kompania.
Punonjësit e OpenAI më pas shprehën hapur pakënaqësinë e tyre me largimin e Altman, duke kërkuar kthimin e tij dhe duke kërcënuar se do të largoheeshin dhe transferoheshin në Microsoft nëse ai nuk do të rikthehej në krye të kompanisë.
“Mënyra se si e pushuat Sam Altman dhe hoqët Greg Brockman nga bordi e vuri biznesin në rrezik dhe minoi misionin dhe kompaninë. Sjellja juaj ka treguar qartë se ju nuk keni autoritetin për të mbikëqyrur OpenAI,” shkruan 743 nga 770 punonjësit në adresë të bordit të kompanisë.
Altman ndihmoi në nisjen e OpenAI si një laborator kërkimor jofitimprurës në 2015 me qëllimin e ndërtimit të inteligjencës artificiale. Kompania më pas u rrit në një nga firmat më të fuqishme të AI në botë, dhe ndërkohë u nda me mbështetësin e hershëm Elon Musk për mosmarrëveshjet për të ardhmen e kompanisë.
Kujtojmë se pas shkarkimit të Altaman-it, shqiptarja Mira Murati u emërua përkohësisht në vend të tij. Kjo vlonjate është një ndër kokat e ChatGPT të OpenA. /tesheshi.com/
