Pas një qetësie disa javore institucionet e Kosovë sërish bëhen cak i sulmeve me granata.
Zyra e Administratës Pensionale të Kosovës që ndodhet në oborrin e ish-pallatit të shtypit që sot shfrytëzohet nga qeveria e Kosovës për ministri të ndryshme, në qendër të kryeqytetit, është institucioni i radhës që është kërcënuar.
Sot është vendosur një mjet tek zyra e këtij institucioni, por fatmirësisht ekipe të demolimit të policisë së Kosovës kanë dalë në vendin e ngjarjes dhe kanë larguar mjetin e dyshimtë.
Zëdhënësja e zyrës rajonale për Prishtinën, Flora Ahmeti ka konfirmuar rastin derisa ka shtuar se ekipet e policisë janë duke i vazhuar hetimet.
“Rreth orës 12:15 është larguar mjeti i dyshimtë nga objetiti i sh’Rilindjes”, ka thënë Ahmeti.
Për mjetin e dyshimtë rreth orës 11:00 është raporuar nga punëtorët e institucionit në fjalë.
Ndryshe, ende nuk janë identifikuar as personat që vendosën granatën në shtëpinë e Murat Mehës, kryetarit të komisionit qeveritar për Demarkacion, si dhe autorët që gjuajtën me granatë televizionin public dhe shtëpinë e drejtorit të përgjithshëm të RTK-së Mentor Shala.
Ndërsa, gjashtë aktivistë të Vetëvendosje-s, sipas prokurorisë dyshohen se kanë kryer njërin sulm me granatë ndaj kuvendit, ku tre aktivistë vazhdojnë të mbahen në paraburgim, kurse tre të tjerë në arrest shtëpiak. /tesheshi.com/
