Rikthehen debatet në rradhët e demokratëve. Pas disa ditësh pushim, duket se mbështetës dhe kritikë të Lulzim Bashës janë përballur sërisht në distancë, duke thumbuar njëri-tjetri nga rrjetet sociale.
Ishte deputeti i Vlorës, Agron Shehaj që përmes një komenti lutej që përveç Majlinda Bregut, kryeministri Edi Rama të marrë edhe Astrit Patozin. Komenti dukej se bazohet në një lajm të emetuar nga mediat, sipas të cilave ish-ministrja e Integrimit në qeverinë Berisha, do të jetë pjesë e kabinetit “Rama2”.
Por në përgjigje të Shehaj ka reaguar aktori i humorit, Julian Deda, i cili është një nga koordinatorët dhe anëtar i Këshillit Kombëtar të PD-së.
Deda thotë se deputetit i PD-së në qarkun e Vlorës mori një rezultat katastrofik, ndërsa tani bën thirrje për përçarje.
“O shoku deputet i pasur, para se të lutesh që Rama të të marrë njerëzit e partisë ku ti u bëre deputet pa asnjë lloj kontributi politik, lutu që qarku, në të cilin ti ishe i pari në listë të mos dalë më me atë lloj rezultati katastrofik historik siç doli kësaj rradhe. Mbi të gjitha lutu, që Rama dhe Veliaj të bien nga pushteti. Apo këtë lutje nuk e bën dot meqë ky i dyti të ka respektuar, të ka qenë për vizitë..?!
Deputetë që luten për përçarje, nuk kisha dëgjuar ndonjëherë. Aq më tepër në kundërshtim të plotë me linjën e kryetarit Basha, i cili deklaroi se çdo ikje nga PD na dëmton”, shkruan Deda në rrjetet sociale. /tesheshi.com/
