Të enjten është lajmëruar nisja e një hetimi të ri nga qeveria polake për rrëzimin e avionit në Rusi në vitin 2010 që i mori jetën presidentit Lech Kaczynski, dhe bashkë me të dhe 95 personave të tjerë, mes të cilëve shumë zyrtarë.
Hetimet e para nga Rusia dhe Polonia patën dalë në përfundimin se rrëzimi i avionit më 20 prill 2010 ishte një aksident, i cili qe shkaktuar nga koha e keqe dhe nga një gabim i pilotit. Por drejtuesi i partisë në pushtet në Poloni, Jaroslaw Kaczynski, vëllai binjak i presidentit të ndjerë, dhe shumë të tjerë mendojnë ndryshe, duke mos besuar në konkluzionet e atij hetimi. Në vend të kësaj, ata dyshojnë se rrëzimi i avionit ishte i qëllimshëm dhe i paramenduar, duke e drejtuar gishtin nga presidenti rus, Vladimir Putin.
Ministri polak i Mbrojtjes, Antoni Macierewicz, tha dje, ndërsa njoftoi për nisjen e hetimit të ri, se ai i pari ka qenë plot me gabime dhe anomali. Inxhinierë e ekspertë teknikë, si dhe katër këshilltarë nga jashtë, do ta përbëjnë më së shumti komisionin e ri hetimor prej 21 anëtarësh.
Ndryshe konservatorëve, ligjvënësit liberalë polakë mendojnë se nuk ka nevojë për një hetim të ri. Kjo nismë mund t’i përkeqësojë marrëdhëniet me Rusinë, tashmë të tensionuara, ndonëse reagimi i parë rus ka qenë fare i butë. “Kjo është e drejta sovrane e Polonisë, e popullit polak, për të kërkuar dhe njohur të vërtetën,” kanë qenë fjalët e zëdhënëses së Ministrisë së Jashtme ruse.
Në avionin e rrëzuar në prillin e 2010-ës gjendeshin 96 persona, mes të cilëve presidenti polak, e po udhëtonin për në Rusi për të përkujtuar viktimat e masakrës së Katinit. /tesheshi.com/
