Hoteli luksoz Ritz-Carlton është hapur sot pas tre muajsh, ku u shndërruar në një burg për një grup miliarderësh dhe zyrtarësh të akuzuar për korrupsion.
Portat e hotelit ku Presidenti Donald Tump qëndroi kur vizitoi Rijadin vitin e shkuar, deri dje ruheshin nga Garda Mbretërore, që ndalonte lëvizjet e një duzine princërish dhe ish-ministrash të rëndësishëm nga Arabia Saudite.
Të arrestuarit u liruan dy javë më parë pas një marrëveshjeje për t’i paguar qeverisë shuma marramendëse.
Një nga klientët e zakonshëm të Ritz, një biznesmen i njohur tha se “ishte një nder të kthehet në hotelin e tij të preferuar”.
Ai tha se punonjësit e pastrimit nuk kishin lënë asnjë gjurmë nga miliarderët në dhoma ku të flesh një natë duhet të paguash 2,439 realë(650 usd).
Stafi i mrekullueshëm i hotelit u shfaq normal. Kamarierët me uniformë u grumbulluan nën shandanët e kristaltë, ndërsa muzika akustike arabe filtrohej përmes altoparlantëve dhe një tis temjan po pastronte ajrin e ambjenteve.
Menaxherët refuzuan një kërkesë për intervistë, por kompania konfirmoi në një deklaratë se hoteli kishte “rifilluar operacionet normale të biznesit që nga sot”.
Ndër banorët të profilit të lartë, që u arrestuan gjatë fushatës kundër korrupsionit, ranë në sy investitori global Princi Alwaleed bin Talal dhe Princi Miteb bin Abdullah, që dikur shihej si një konkurrent kryesor për fronin.
Princi Miteb u lirua pasi pranoi të paguante mbi 1 miliard dollarë. Këtë e konfirmoi për Reuters një zyrtar i lartë saudit .
Princi Alwaleed i qëndroi deklaratës për pafajësinë e tij.
Një zyrtar i lartë saudit më vonë tha se ai ishte liruar pas arritjes së një marrëveshjeje financiare, pa detajuar kushtet.
Prokurori i Përgjithshëm i shtetit ka thënë se qeveria ka rregulluar të mbledhë më shumë se 106 miliardë dollarë nëpërmjet marrëveshjeve të tilla.
Kritikët e cilësuan fushatën si një intrigë pushteti nga princi 32-vjeçar i Kurorës, Mohammed bin Salman, i cili synon të rishikojë mënyrën se si drejtohet Monarkia thellësisht konservatore dhe ta zvogëlojë varësinë nga të ardhurat e naftës.
Dhjetë ditë para fillimit të spastrimit, Ritz priti një konferencë ndërkombëtare biznesi, ku Princi Mohammed foli vetë në podium dhe u takua me pjesëmarrës dhe admirues.
Disa pjesëmarrës të konferencës përfunduan më vonë si të burgosur.
Në mungesë të më shumë informacioneve, spekulimet ishin të shumta për atë që po ndodhte brenda në Ritz. Autoritetet mohuan thashethemet e torturës dhe se të arrestuarit tentuan vetëvrasjet.
Prokurori i Përgjithshëm ka thënë se 56 vetë mbeten në paraburgim. Ata besohet se janë zhvendosur në burg pasi refuzojnë të pranojnë akuzat dhe mund të përfundojnë në gjykatë.
Ahmed al-Safer, një biznesmen jemeno-amerikan i cili rregullisht qëndron në Ritz, u ndal sot për të pirë çaj me miqtë.
I pyetur nëse kjo kishte ndikuar në reputacionin e hotelit, ai tha: “Tani hoteli është edhe më i famshëm. Të gjithë do të vizitojnë vetëm për të bërë një fotografi”. /tesheshi.com/
