Arabia Saudite ka rihapur të martën ambasadën në kryeqytetin e Irakut, të mbyllur 25 vite më parë. Në të kanë mbërritur 35 punonjësit e personelit, të shoqëruar nga zëvendësambasadori. Vetë ambasadori pritet të vijë të enjten, për të marrë pjesë në ceremoninë zyrtare të hapjes.
Marrëdhëniet diplomatike mes dy vendeve u prishën në vitin 1990, pasi Iraku pushtoi Kuvajtin, për t’u rivendosur në 2004-ën, kur mori fund regjimi i Sadam Huseinit.
Në vitin 2012 sauditët do të emëronin një ambasador jorezident, por marrëdhëniet do të vijonin të mbeteshin gjithsesi në nivele të ulëta.
Përgatitjet për hapjen e ambasadës nisën në fillim të këtij viti, kur sauditët dërguan një delegacion në Bagdad për këtë qëllim. Iraku është kritikuar për një kohë të gjatë prej zyrtarëve të Arabisë Saudite për nxitjen e diskriminimit në kurriz të sunnitëve, e për marrëdhënie të ngushta me Iranin shiit, çka është kundërshtuar nga pala tjetër.
Veç ambasadës, pritet që së shpejti të hapet një konsullatë dhe në Erbil, në kryeqytetin e rajonit autonom kurd në veri të Irakut. /tesheshi.com/
