Tre ditë para festës së Bajramit, është rikthyer debati mbi (mos)ndërtimin i xhamisë qendrore në Prishtinë gurthemeli i së cilës është vënë para pesë vitesh, por që më asnjë tullë e vetme nuk është ngritur.
Është myftiu i Bashkësisë Islame të Kosovës, Naim Tërnava i cili ka drejtuar gishtin e fajita në drejtim të Komunës së Prishtinës duke thënë se nuk po lëshohet leja.
Kjo e ka shtyrë që Tërnavën që të ashpërsojë dhe gjuhën, duke thënë se ajo do të ndërtohet edhe pa leje, pasi sipas tij durimit i ka ardhur fundi.
Ai ka thënë se do të jetë në krye të këtij vendimi, dhe nëse do të duhet të arrestohet dikush për këtë, adresa është ai vet personalisht.
Mosndërtimi i kësaj xhamie Tërnava ka thënë se ka bërë që në drejtim të tij të vijnë shumë mesazhe, një pjesë e tyre edhe fyese.
“Me plotë të drejtë, më kanë thënë, kryetar pse po vazhdon të qëndrosh në krye të Bashkësisë Islame kur ke dështuat qe ta ndërtosh xhaminë. Paratë për ndërtimin e xhamisë janë donacion nga Turqia, i njëjti burim që ka financuar edhe ndërtimin e xhamisë në Tiranë. Problem është vetëm leja. Ata nuk munden të na e caktojnë neve se si do të duhet të duket projekti. Atë projekt e ka zgjedhur populli, siç po thuhet tani, e ka zgjedhur sovrani”, ka thënë Tërnava, në një intervistë dhënë në RTK, duke paralajmëruar se punimet mund të nisin shpejt por nuk ka dhënë një datë se kur.
Kujtojmë se me datë 7 mars të këtij viti kreu i Prishtinës Shpend Ahmeti, mohoi që komuna që drejton po zvarrit lejen për ndërtimin e xhamisë.
Për këtë çështje, Ahmeti tha se duhet zbatohen procedurat e nevojshme, në mënyrë që procesi të realizohet me transparencë dhe me debat publik.
Ky projekt sipas të parit të kryeqytetit nuk është afatshkurtër, prandaj zgjidhja sipas tij, duhet të jetë e qëndrueshme dhe me planifikim të mirëfilltë.
“Përveç nevojës së komunitetit të besimtarëve që është e plotësisht e qartë, duhet të trajtohet i gjithë blloku, lagja, komunikacioni dhe shumë çështje të tjera. Prandaj me trajtime nga ekspertët, zyrtarët, banorët dhe përfaqësuesit e komunitetit do ti zgjidhim të gjitha çështjet”, ka shkruar Ahmeti në Facebook.
Xhamia e Madhe në Prishtinë është paraparë të ndërtohet në lagjen “Dardania” të kryeqytetit në një hapësirë prej 80 arësh.
Gurthemeli për ndërtimin e xhamisë u vë me pompozitet, në vitin 2012, nga krerët e atëhershëm të institucioneve, presidentja Atifete Jahjaga, kryeministri Hashim Thaçi, kryeparlamentari Jakup Krasniqi dhe kryetari i Prishtinës, Isa Mustafa.
Por, as pas pesë vjet xhamia nuk ka nisur së ndërtuari. /tesheshi.com/
