Nxehen motorët për zbatimin e vettingut, ku ndërkombëtarët kanë përjashtuar kandidatura të bujshme si qeveritari Plarent Ndreca, për Këshillin e Lartë të Prokurorisë.
Pas prillit, kur u zgjodhën anëtarët e komisioneve të vettingut, kjo është hera e dytë që Kuvendi ngre komisionet ad hoc për të vendosur mbi vettingun që kanë bërë ndërkombëtarët.
PS-ja ka caktuar deputetët më me peshë të saj si anëtarë të komisionit, përkatësisht Ulsi Manjën, Vasilika Hysin dhe Klotilda Bushkën.
Ndërkohë, PD-ja ende nuk ka paraqitur emrat, megjithëse burime nga selia blu theksojnë se Alibeaj dhe Bylykbashi janë kandidatura të preferuara të Bashës.
Kurse LSI pritet të propozojë Petrit Vasilin dhe Vasil Naçon.
Megjithatë deri tani, opozita nuk ka dërguar shkresë në Kryesinë e Kuvendit.
Këshilli i Lartë i Prokurorisë do ketë 11 anëtarë. Gjashtë prej tyre zgjidhen nga radhët e prokurorëve dhe pesë anëtarë zgjidhen nga Kuvendi, nga radhët e juristëve jo-prokurorë. /tesheshi.com/
