Bankat greke u rihapën këtë të hënë, pas tre javësh me dyer të mbyllura për shkak të situatës me borxhin, që nxiti druajtjen edhe të një falimentimi. Athina tashmë, sipas marrëveshjes me kreditorët e saj, duhet të kryejë reforma duke marrë në këmbim huanë e tretë të shpëtimit që do të shmangë falimentin dhe daljen nga eurozona.
Radhët përpara bankomatëve u shndërruan në një fakt të jetës së përditshme në Greqi për javë me radhë pasi njerëzit prisnin të merrnin për secilën ditë 60 eurot që lejoheshin, kufizim ky i vendosur nga frika e falimentimit të bankave.
Nga kjo e hënë, limiti ditor bëhet javor, 420 euro në javë, që do të thotë se grekët nuk duhet të mbajnë radhë secilën ditë.
Por, ndërsa hapja e bankave sjell disi normalitetin në jetën e qytetarëve dhe ekonominë greke, probleme të mëdha mbeten. Papunësia është shumë e lartë dhe recesioni grek, sipas statistikave, është i krahasueshëm me krizën e viteve ’30 në Shtetet e Bashkuara. /tesheshi/
