Misioni amerikan në Turqi njoftoi për rihapjen e ambasadës së SHBA-së në Ankara dhe të dy konsullatave, në Stamboll e Adana, vetëm një ditë pasi ato qëndruan të mbyllura për shkaqe sigurie.
Pak orë pas vrasjes së ambasadorit rus në Ankara, një person qëlloi me armë pranë ambasadës amerikane. Edhe pse nuk pati të lënduar e personi u arrestua, misionet diplomatike amerikane qëndruan të mbyllura gjatë ditës së djeshme.
Si ambasada, ashtu dhe konsullatat rihapen për shërbime konsullore të ngutshme, ndërsa shërbimet e rregullta konsullore nuk do të ofrohen tani për tani.
“Misioni në Turqi i informon qytetarët amerikanë se ambasada në Ankara, konsullata e përgjithshme e Stambollit dhe konsullata e Adanasë do të rihapen të mërkurën, më 21 dhjetor, mbi një bazë veprimi të kufizuar,” thuhet në njoftimin e misionit amerikan.
Shpërthimet e fundit terroriste, vrasja e ambasadorit rus, si dhe incidenti para ambasadës amerikane, kanë krijuar një atmosferë pasigurie në Turqi, rrjedhojë e së cilës është dhe kufizimi i veprimtarisë së misionit të SHBA-së në këtë vend. /tesheshi.com/
