Ndërprerja e largimit të njerëzve nga pjesa lindore e Halepit është lënë pas, dhe evakuimet kanë rinisur.
“Autobusët po lëvizin tani përsëri nga lindja e Halepit. Shpresojmë që të vazhdojë kështu, që njerëzit të mund të evakuohen pa pësuar gjë,” i ka deklaruar Reuters-it një zyrtar i OKB-së.
Njerëzit kanë qenë në pritje në mes të të ftohtit të akullt pas problemeve me evakuimin. Të dyja palët, kryengritësit dhe forcat qeveritare, kanë akuzuar njëra-tjetrën për ndalesat e evakuimit.
Zëdhënësja e ICRC-së, Krista Armstrong, i tha të njëjtës agjenci lajmesh se evakuimi do të kërkonte dhe pak kohë, mbase pjesën më të madhe të ditës së sotme.
Të evakuuarit janë dërguar përgjithësisht në pjesën perëndidmore të qytetit, si dhe në Idlib. Të evakuuarit e fundit mendohet të jenë kryengritës, si dhe familjet e tyre.
Me zbrazjen e pjesës lindore të qytetit, Beshar Esadi do të marrë kontrollin e plotë të Halepit, çka është dhe fitorja e tij më e madhe përgjatë konfliktit gjashtëvjeçar. /tesheshi.com/
