Presidenti i Serbisë, Aleksandar Vuçiç pret që vazhdimi i dialogut mes Serbisë dhe Kosovës të bëhet në fund të këtij muaji apo në fillim të muajit të ardhshëm.
Mirëpo, zyrtarë të qeverisë së Kosovës kanë një mesazh për të në lidhje me këtë çështje. Ministrja në largim e Dialogut, Edita Tahiri i sugjeroi Serbisë që të merren me zbatimin e tetë marrëveshjeve të arritura deri më tani.
Tahiri thekson se rifillimi i dialogut do të bëhet vetëm pas krijimit të institucioneve të reja në Republikën e Kosovës.
“Porosia ime për Serbinë dhe Vuçiçin është që le të merren me zbatimin e marrëveshjeve sepse janë tetë të tilla, që Serbia nuk i ka zbatuar. Ndërsa rifillimi i dialogut bëhet pas krijimit të institucioneve të reja në Republikën e Kosovës”, ka thënë Tahiri për Indeksonline.
Ndërsa angazhimet e mëdha për rifillimin e dialogut nga ana e Serbisë, sipas Tahirit, nuk i mbulojnë shkeljet që ata i bënë marrëveshjeve.
“Serbia nuk mund të mbulojë shkeljet që i bënë marrëveshjeve me deklarata boshe gjoja si angazhim për dialog”, ka shtuar ajo.
Ndërprerja e dialogut është bërë që në muajin mars të këtij viti, pas ndalimit që iu bë liderit të AAK-së, Ramush Haradinaj me urdhër-arrest të Serbisë në Francë. /tesheshi.com/
