Është rishfaqur Gjergj Bojaxhi, ku me anë të një mesazhi në FB, ka paralajmëruar krijimin e një force të re politike. Prej kur kandidoi për Bashkinë e Tiranës si kandidat i pavarur, ku morri jo pak vota, në raport me fushatën që bëri, tejet modeste, ai u tërhoq nga politika e ditës, për t’u rikthyer pas disa muajsh me paralajmërimin se do jetë aktiv.
“Para gjashtë muajsh, 16 mijë qytetarë të Tiranës votuan për t’i thënë “Ndal!” këtij rrënimi. Por kaq nuk mjafton! Për të ndalur rrënimin tashmë alarmues, kërkohet një bashkim shumë më i gjerë. Kërkohet një besim dhe kurajë që nuk shteron, për t’i dhënë fund plogështisë dhe fatalizmit tonë. Gjuhës mashtruese të politikanëve nuk mund t’i përgjigjemi as me plogështi, e as me fatalizëm.Të bëhemi bashkë, të organizohemi dhe t’ua heqim nga duart të paaftëve dhe të korruptuarve Shqipërinë tonë, për ta zhvilluar atë siç e meriton. Duhet ta hedhim këtë hap së bashku për fëmijët tanë dhe për veten tonë.
Jemi Ne që, me veprimin tone, duhet të tregojme se për Shqipërinë ka mbërritur një epokë e re.
Ftoj cilindo që ndihet njësoj dhe shpreson njësoj që të bashkohet me nismën tonë të re politike”, shkruan Bojaxhi në mesazhin e tij.
Por ndërkohë, kanë nisur reagimet e para të cilat e konsiderojnë atë si të dyshimtë në këtë lëvizje, duke e renditur tek aktet konspirative. Kështu ndodhi dhe me kandidimin e tij për Tiranën, ku nuk munguan zërat se ai po punon për Ramën. Por në fakt, personaliteti dhe karriera e Gjergj Bojaxhiut, nuk kanë asnjë të dhënë kompremtuese se ai mund të bjerë në një nivel të tillë. /tesheshi.com/
