Në filmin e fundit “Oh, Kanada”, aktori hollivudian Richard Gere kënaq sërish publikun, por këtë herë me “dyfishin e tij më të ri”, Jacob Elordi, yllin e serialit të njohur “Euphoria”.
Richard Gere, i cili gjatë karrierës së tij u bë një nga burrat më të dëshirueshëm në botë falë roleve në filmat romantikë të kultit si “An Officer and a Gentleman”, “Pretty Woman”, “Runaway Bride” dhe “Autumn in New York”, është sërish në qendër të vëmendjes.
Në filmin “Oh, Kanada”, i cili u shfaq premierë në Festivalin e 77-të të Filmit në Kanë në maj të këtij viti, Gere luan rolin kryesor – regjisorin Leonard Fife, i cili përballet me vdekjen nga kanceri dhe vendos të bëjë një dokumentar autobiografik.
Filmi është një adaptim i romanit të vitit 2021- “Foregone” nga Russell Banks dhe është drejtuar nga Paul Schrader, i njohur për veprat e tij si “Taxi Driver” dhe “First Reformed”. Përveç Gere, në film shfaqen edhe Uma Thurman, Michael Imperioli, Victoria Hill dhe aktori i ri Jacob Elordi, i cili portretizon versionin më të ri të Leonard Fife.
Jacob Elordi, i cili fitoi popullaritet global me rolin e tij në “Euphoria”, si dhe Priscilla e Sofia Coppola, merr një rol kyç në “Oh, Kanada”, i cili, sipas regjisorit, ishte një zgjedhje perfekte. Edhe pse Elordi sapo po depërton në skenën e Hollivudit, popullariteti dhe statusi i tij si “sex symbol” e kanë vendosur tashmë atë në hartë si një nga aktorët më të rinj dhe më premtues sot.
Regjisori Paul Schrader thekson se ai nuk e punësoi Elordin për shkak të famës së tij, por sepse ai pa potencial në interpretimin e tij të versionit të ri të Fife. Ai shton gjithashtu se Elordi nuk u përpoq t’i “vidhte” rolin Richard Gere, siç mund të kishte bërë nëse të dy do të ishin në të njëjtën epokë filmike.
Vetë Richard Gere ka vetëm fjalë lavdërimi për kolegun e tij më të ri:
“Ne nuk kemi punuar shumë së bashku, por ai ishte fantastik. Ka një moment ku ne të dy jemi në kuadër, por ai është pothuajse i padukshëm – unë jam brenda dhe ai është jashtë. Megjithatë, unë u mahnita nga performanca e tij në film dhe isha shumë i lumtur kur po e shikoja”, tha Gere.
Filmi tashmë ka tërhequr shumë vëmendjen e kritikës dhe publikut në Festivalin e Filmit në Kanë. /tesheshi.com/
