Prej shtatorit të shkuar, në garën e Singaporit, për herë të parë nuk kemi një pilot të Mercedes-it në pole position. Daniel Ricciardo, australiani që piloton një prej makinave Red Bull, ka dalë i pari sot në provat e Monakos, duke premtuar një garë të jashtëzakonshme ditën e nesërme.
Ky ishte pole position-i i parë në karrierën e Ricciardo-s, e i pari për Red Bull-in pas tre vitesh, që prej garës së Brazilit në 2013-ën.
Një vend i parë që paralajmëron një kthim të Red Bull-it në majat e Formula 1-shit. Një kthim i sinjalizuar që në garën e shkuar, në Spanjë, ku fitoi debutuesi Verstappen.
Kryesuesi i botërorit, Nico Rosberg, bëri aq sa mundi, duke marrë vendin e dytë. Ndryshe qenë provat për Hamilton-in, që vijon të ketë probleme me Mercedes-in e tij. Makina do t’i humbte fuqi në momentin më kritik të provave; një dëm i zvogëluar me vendin e tretë në nisje nesër në Monako.
Përkundër Ricciardo-s, Verstappen, shoku i tij i skuadrës, harroi se gara zhvillohet në rrugë qytetase, duke u përplasur që në sesionin e parë, çka do të thotë se ai do të niset nga vendi i 21-të të dielën.
Zhgënjim për Ferrari-n, që ngjan të bëjë hapa prapa. Aq sa sjell dhe reagimin e patakt të gjermanit Vettel, që edhe pse u pozicionua i katërti, shfryn keqas ndaj makinës. Raikkonen i mbylli provat dy vende më poshtë, por do të niset i 11-të, për një dënim me pesë vende për një ndërhyrje mekanike në makinë.
Dhjetëshja e parë në nisje të garës së Monakos, e gjashta sezonale, do të jetë kjo: Ricciardo, Rosberg, Hamilton, Vettel, Hulkenberg, Sainz, Perez, Kvyat, Alonso, Bottas.
Veç të papriturave dhe aksidenteve, që janë të zakonshme tradicionalisht në këtë garë, gjasat janë që të bjerë shi. Nëse ngjet kështu, gara do të bëhet tërësisht e paparashikueshme. /tesheshi.com/
