Franck Ribery-së ende nuk i ka dalë e keqja për mundësinë që kishte për të fituar Topin e Artë në vitin 2013. Në një prononcim për mediat, francezi deklaroi me ton të prerë se titulli që shkoi në favor të Cristiano Ronaldos, iu “vodh” atij.
“Më është grabitur ai Top i Artë. është e pashpjegueshme. Fitova të gjithë trofetë e mundshëm atë vit, nuk mund të bëhej më shumë se ajo që bëra unë. Ka qenë një padrejtësi e madhe”- është shprehur 32-vjeçari, i cili atë vit qëndronte në krah të Messit e Ronaldos në garë, e humbi për fare pak përqindjen që e bënte lojtarin më të mirë.
Por mesfushori i Bayern Mynih, sulmon edhe vendin e tij, Francën, që nuk e mbështeti në këtë garë për titullin e lojtarit të vitit 2013.
“Nuk e ndjeja vendin tim pas meje, duke më mbështetur. E pashë me sytë e mi që francezët thonin që titullin e lojtarit më të mirë duhej ta fitonte Ronaldo. Pse portugezët do të donin që ta fitoja unë ose Messi titullin? Kurrën e kurrës. Ndërsa francezët donin që të mos e fitonte Topin e Artë një francez” – ka përfunduar Ribery.
Në vitin 2013, Franck Ribery fitoi Champions League, Bundesligën, e Kupën e Gjermanisë, me ngjyrat e Bayern Mynih. /tesheshi.com/
