Shukri Buja dje vendosi zyrtarisht të vazhdojë aktivitetin politik te NISMA-n e Fatmir Limajt, duke lënë kështu PDK-në ku ishte prej 17 vitesh.
Buja tha se braktisi partinë që drejtohet nga Kadri Veseli pasi iu mbyllën të gjitha shtigjet pa treguar më shumë, ndërsa refuzoi të përgjigjej për raportet me kreun e PDK-së.
Ai vlerësoi Limajn për të cilin tha se i hapi dyert, ndërsa kujtoi kohën kur vepruan së bashku në frontet e luftës si ushtarë të UÇK-së.
Por katër vjet më parë Buja kishte mendim krejt tjetër për bashkëpartiakun e tij Limaj duke e akuzuar se punonte kundër PDK-së.
Buja deklaroi atë kohë se Fatmir Limaj e Jakup Krasniqi duhet të japin dorëheqje nga partia në të kundërtën ata duhet përjashtuar. Kjo thirrje e Bujës erdhi pak ditë pasi një thirrje të tillë e bënë edhe PDK-istët e tjerë si Sokol Bashota, kryetar aktual i Klinës, dhe Isni Kilaj ish-kryetar i Malishevës, aktualisht zv.ministër në detyrë i Financave.
“Realisht, Limaj ka qenë kundër PDK-së. Nuk e di pse nuk jep dorëheqje prej partisë. Dorëheqje duhet të japë edhe Jakup Krasniqi dhe disa personalitete që janë brenda partisë e që kanë punuar kundër PDK-së. Nëse ata vazhdojnë të veprojnë kundër partisë atëherë duhet të përjashtohen”, deklaroi Buja më 2013.
Në atë kohë, Buja zhvlerësoi edhe peshën politike të Limajt e Krasniqit, pra përkrahjen e tyre qytetare në mbarë vendin.
“Forca e tyre është treguar deri nën 25 mijë vota. Nuk mund ta dëmtojnë PDK-në”, deklaronte ai.
Ja ç’thotë Buja për akuzat ndaj Limajt…
Për akuzat në fjalë Buja në një intervistë për mediat kosovare është munduar t’i arsyetojë në një mënyrë.
Në emisionin “Interaktiv” të Koha Vizionit, ai ka thënë se akuzat e njëjta, pra për përjashtim nga partia do t’ia bënte edhe Hashim Thaçit, kur bëhet fjalë për respektimin e rregullave që e përcakton Partia Demokratike në këtë rast.
“Kam kërkuar respektimin e rregullave. Nëse e merrni statusin e PDK-së e shihni që janë shkelje të rënda”, ka thënë Buja.
Por katër vjet më pas, raportet Limaj-Buja janë rregulluar dhe tashmë ish-PDK-isti do të jetë nën urdhërat e njeriut që dikur kërkonte përjashtimin e tij nga partia ku vepronin.
Kështu ish-ushtarakët e UÇK-së kanë harruar inatet dhe janë bërë edhe një herë bashkë ku tashmë do të “luftojnë” kundër Kadri Veselit.
Të paktën aktualisht do ta sfidojnë nëpër komuna ku NISMA do garojë si parti e vetme, ndërsa në nivelin qendror përkundër inateve që mund të kenë me krerët e ish-partisë së tyre do të ndajnë bashkë tortën e pushtetit. /tesheshi.com/
