Pas dështimit të tubimit të gushtit një “gurgule” e re po përgatitet në Himarë që koinçidon me ardhjen e ambasadores së re greke në Tiranë.
Grupimit “Komuniteti Himariot” që drejtohet nga biznesmeni Nikollaq Neranxi, i janë bashkuar edhe shumë shoqata të tjera që numerikisht nuk përbëjnë një grumbullim forcash por që janë regjistruar si sasi organizatash të shoqërisë civile.
Bashkë me Neranxin është grupuar edhe Kristaq Jorgji, i cili u bë i njohur kur replikoi për profesor Kristo Frashrin në debatin mbi atë çka është Himara, greke apo shqiptare.
Me Kristaq Jorgjin, i cili ka qenë i lidhur me shumë veprimtari të lobit grek edhe në SHBA, kanë formuar shoqatën e pronarëve të bregdetit, që synojnë të rrisin presionin ndaj qeverisë.
Kësaj loje i është bashkuar politkisht edhe shoqata OMONIA por edhe PBDNJ e Vangjel Dules.
Në një deklaratë për shtyp, kjo forcë politike akuzon kreun e bashkisë së Himarës se po shkel të drejtat e banorëve.
“Në një kohë që Kryetari i Bashkisë Himarë Z. Goro i përkushtuar në zbatimin e projektit të Z. Rama për dhunimin dhe rrëmbimin më çdo formë e mënyrë të pronës së ligjshme të Himarjotëve ditët e fundit po tentohet fillimi i punimeve për ngritjen e një objekti të pa ligjshëm në zonën e Livadhit.
Megjithëse nuk ka studim urbanistik për Livadhin dhe pavarësisht dokumentacionit të fallcifikuar, në shkelje flagrante Bashkia e Himarës jo vetëm që ka lëshuar leje ndërtimi të pa ligjshme por me strukturat e saj dhe në veçanti Policinë Bashkiake kërkon të behet garante e këtij projekti.
I drejtohemi edhe njëherë opinionit vendas po edhe faktorit ndërkombëtar të kthejë vështrimin nga aktet e përditshme të realizimit të planit të Z. Rama që ka për synim ekskluziv tjetërsimin e statusit pronësorë në zonën më të gjerë të Bashkisë së Himarës në dëm të banorëve vendas që janë edhe pronarët e ligjshëm”, theksohet në deklaratën e PBDNJ-së.
Ndërkaq, Nikollaq Neranxi ka bërë të ditur në faqen e tij se janë përfshirë në protesta edhe emigrantët nga SHBA.
“Komuniteti Himariot i Amerikes, mbeshtetes i fuqishem i kauzes sone per te marre pronat e trasheguara. Nuk munguan as sot ne takimin tek kisha e Shen Thanasit ne Dhermi me mesazhin e qarte: “Asnje investim ne zone, pa marre pronat e trasheguara!”, shkruan Neranxi në faqen e tij.
Kështu pra, me largimin e Bollanos dukej se Himara do binte në qetësi, por më shumë se një emër bashkiaku, janë pronat ato që nuk e lënë rehat Shqipërinë në përgjithësi, e aq më shumë Himarën në veçanti, pas së cilës fshihen padyshim dhe interesa të tjera.
Kujtojmë që reforma territoriale, ishte ajo që ngacmoi deri dhe raportet mes Tiranës dhe Athinës, që siç dihet janë të ftohta.
Me këtë reformë, ku Labërisë i hapej shtegu për t’u derdhur në Himarë, elementi grekofon i atyshëm e ndjeu humbjen e statusit të qytezës si një “kështjelle greke” në jugun e Shqipërisë, e sidomos në pjesën më të bukur të bregdetit të saj. /tesheshi.com/
