Në një konferencë shtypi një ditë më parë, princi saudit i kurorës, e njëkohësisht ministri i Brendshëm në qeverinë suadite, Muhammed bin Najif, i ka quajtur të pabaza kritikat e Iranit për administrimin e haxhit.
“Nuk ka besueshmëri në pretendimet e tyre, dhe ata e dinë fare mirë se mbretëria ofron shërbime të shkëlqyera për të gjithë pelegrinët, duke përfshirë iranianët,” ka thënë ai.
Irani është akuzuar për pengim të pelegrinëve të tij për të kryer haxhin, e për politizim të haxhit.
Princi i kurorës do të thoshte, “Autoritetet iraniane janë ato që nuk duan t’i dërgojnë pelegrinët në haxh, si pjesë e përpjekjes së tyre për ta politizuar ritualin.”
“Misioni iranian i haxhit bëri disa kërkesa që ishin në shkelje të rregullave të haxhit,” ka shtuar Muhammed bin Najif.
Riadi dhe Teherani nuk gjetën gjuhën e përbashkët në prill të këtij viti për haxhin dhe për përgatitjet për të, me përplasjen që shkoi më tej pasi Teherani kërkoi që pelegrinët iranianë të lejohen të përmbushin disa praktika gjatë haxhit, të ndaluara nga autoritetet saudite. Gjërat e kërkuara nga Irani vinin në rrezik sigurinë e pelegrinëve të tjerë.
“Arabia Saudite,” tha princi i kurorës, “nuk do të tolerojë asnjë shkelje që vë në pikëpyetje sigurinë, apo prek sigurinë e pelegrinëve, qoftë nga Irani apo nga ndonjë palë tjetër.”
Marrëdhëniet mes Arabisë Saudite dhe Iranit mbeten të tensionuara. Qeveria iraniane e bllokoi këtë vit vajtjen në haxh të pelegrinëve të saj, një lëvizje që u çmua si politizim i haxhit. /tesheshi.com/
