Pavarësisht se vlerësimi ndërkombëtar renditi nxënësit e Kosovës ndër tri vendet më të dobëta për sa i përket nivelit të edukimit, Arsim Bajrami, ministër i Arsimit vitin 2016 e vlerëson si të suksesshëm duke thënë se është punuar për rritjen e cilësisë.
Duke folur për rezultatin e PISA-s, ai ka thënë se vlerësimi i bërë për nxënësit ka treguar nivelin për të cilin e kanë ditur edhe me herët.
Duke qenë i vetëdijshëm se cilësia mbetet një sfidë e fortë për ministrinë që drejton, Bajrami u shpreh se në testin e PISA-s 2018 nuk pret mrekulli por premetoi do të ketë rritje në cilësi.
Ministri i Arsimit në konferencën e fundit për këtë vit ka folur edhe për arsimin e lartë për të cilin tha se ky sektor është stabilizuar pas dy viteve.
Rezultatet e testit ndërkombëtar PISA, e nxorrën sistemin kosovar në një nivel mjaft të ulët. Kjo u bë shkak për çëljen e një debati mbi atë se ç’po ndodh në shkollat e Kosovës, në cilësinë e mësimdhënies. Ndërsa në Shqipëri, kryeminitri Rama u krenua me rezultatet e PISA-s sa i takon arsimit në Shqipëri, duke thënë se kjo ka ardhur falë reformave – meqë për Shqipërinë treguesit ishin diçka më mirë. /tesheshi.com/
