“Antidroga, një histori suksesi”. Autoritetet në Tiranë së bashku me krerët e policisë, nën këtë moto, paraqitën sot ato që i cilësuan rezultate të aksionit mbarëkombëtar kundër lëndëve narkotike.
Në një transmetim live në televizion, ministri i Brendshëm Saimir Tahiri deklaroi rezultatet me statistika, që sipas tij, hedhin poshtë të gjitha akuzat e kohëve të fundit nga ana e opozitës. Kjo e fundit e ka akuzuar personalisht Tahirin për përfshirje dhe lidhje me narkotrafikun.
“Në vitin 2013, kur PD ishte në pushtet janë 323 hektarë hashash të identifikuara nga fotografimi ajror i Guardia di Finanza, nga këto u shkatërruan 7.5 përqind e parcelave. Në 2015, 44 hektarë janë identifikuar nga Guardia di Finanza, 8 herë më pak drogë sesa në vitin 2013. Nga kjo sipëfaqe policia ka shkatërruar 99.2 përqind të sipërfaqeve të identifikuaa. Që nga shtatori 2013, 94.7 përqind më shumë drogë sesa 8 vitet e qeverisë së kaluar mbledhur së bashku. Të gjitha këto nuk janë trillim. Edhe numri i autorëve të vendosur para ligjit është më i madh sesa numri i atyre në 8 vite të PD-së”, tha Tahiri.
“Kryetari i PD kishte manipuluar fotografinë e Policisë në aksionin e asgjësimit të drogës. Si mund të katandiset numri një i opozitës në këtë gjendje, duke manipuluar fotografinë nga një aksion antidroge i Policisë së Shtetit?”, akuzoi Tahiri, duke sugjeruar për akuza jo vetëm të pabaza por edhe tendencioze ndaj tij. /tesheshi.com/
