Kampionati gjerman ka ofruar këtë pasdite dy përfundime krejt të papritura në javën e 20-të të tij. Dy nga kryesuesit janë dorëzuar para ekipeve të vendeve të fundit, por mund të kishte shkuar dhe më keq nëse Bajerni i Mynihut nuk do të kishte këmbëngulur gjer në çastet e fundit.
Fitorja 0-3 e Hamburgut në fushën e Lajpcigut është një prej befasive më të mëdha. I përforcuar në janar me lojtarë të tillë si Mavraj e Papadopoulos, Hamburgu ka arritur fitoren e tretë brenda një jave, e të dytën rresht në kampionat.
Ndaj Lajpcigut të vendit të dytë, Hamburgut nuk i njihej përpara ndeshjes asnjë mundësi që të fitonte, por fusha ka treguar krejt të kundërtën. Hamburgu jo vetëm i ka mposhtur vendasit, por ka fituar thellë, 0-3. Papadopoulos, Walace e Hunt kanë qenë shënuesit për skuadrën e njohur gjermane.
Humbja e Verder Bremenit 0-1 ndaj Borusias së Mynshegladbahut ka bërë që të ndryshojnë vendet në renditje, Verderi të zbresë në vend të 16-të, e Hamburgu të ngjitet në të 15-tin.
Një tjetër befasi ka qenë fitorja e Darmstadtit, ekipit të fundit në klasifikim, ndaj Borusias së Dortmundit. Ashtu si Hamburgu, Darmstadti ka bërë përforcime gjatë janarit. Hamit Altıntop është sjellë nga Gallatasaraji, në një kthim të turkut në kampionatin gjerman.
Darmstadti e ka mposhtur 2-1 Borusian e Dortmundit. Boyd e Colak qenë shënuesit për vendasit, me Guerreiro-n që e barazoi përkohësisht rezultatin në fundin e pjesës së parë.
Bajerni i Mynihut ka shmangur barazimin ndaj një tjetër ekipi të vendeve të fundit. Bavarezët kanë fituar 0-2 në fushën e Ingolstadtit falë dy golave të çasteve të fundit. Vidal realizoi në minutën e 90-të; Robben dyfishoi shifrat në minutën e 91-të. /tesheshi.com/
