Të mërkurën, përfaqësuesit e Parlamentit Evropian miratuan me shumicë të madhe Rezolutën për Serbinë, e cila shpreh mbështetjen për anëtarësimin e Serbisë në Bashkimin Evropian, por Beogradit zyrtar i bëhet thirrje për respektim urgjent të sanksioneve ndaj Rusisë dhe Bjellorusisë, dhe këtë e vendos si një nga kushtet për përparimin e mëtejshëm të Serbisë në rrugën drejt integrimeve evropiane.
Raporti i reporterit Vladimir Bilçik për Serbinë u mbështet nga 523 deputetë të PE, 78 ishin kundër dhe 34 abstenuan.
Rezoluta për Serbinë shpreh mbështetjen e PE për “anëtarësimin e ardhshëm të Serbisë në BE”, por gjithashtu kujton se një perspektivë e besueshme e zgjerimit kërkon angazhim në reformat e nevojshme dhe respektimin e standardeve dhe vlerave evropiane.
Për njohjen reciproke të Kosovës dhe Serbisë
Në raportin e këtij viti për Serbinë, Parlamenti Evropian, përveç sundimit të ligjit dhe normalizimit të marrëdhënieve me Kosovën, ka përfshirë edhe harmonizimin me sanksionet kundër Rusisë si element kyç që duhet të përcaktojë progresin e përgjithshëm të vendit në rrugën drejt anëtarësimit në BE.
Bilçik thekson se anëtarësimi në BE është një “vendim strategjik i Serbisë” dhe se PE pret që ai “të trajtohet strategjikisht nga udhëheqja politike e vendit”.
“Prandaj është e rëndësishme që Serbia të shkojë drejt BE-së dhe jo anash”, tha Bilçik.
Në tekstin e rezolutës përfshihen amendamente se Serbia dhe Kosova pritet të nënshkruajnë një marrëveshje ligjërisht të detyrueshme për normalizimin e marrëdhënieve, “bazuar në njohjen reciproke”, që është hera e parë që njohja reciproke përmendet në një dokument zyrtar të institucioni i BE-së si zgjidhje e nevojshme për dialogun ndërmjet Kosovës dhe Serbisë.
I miratuar në seancën plenare, raporti i PE-së mori formën e një rezolute, e cila nuk është ligjërisht e detyrueshme, por paraqet udhëzime politike për vendin në procesin e integrimit evropian. /tesheshi.com/
