Senatorja demokrate Jeanne Shaheen, e Komitetit të Punëve të Jashtme dhe kryetare e Nënkomitetit për Evropën dhe Bashkëpunimin e Sigurisë Rajonale, rinovoi një propozim rezolutë dypartiake, së bashku me senatin republikan Roger Wicker dhe kolegët demokratë Ben Cardin, Dick Durbin dhe Chris Van Hollen, të cilët promovojnë bashkëpunimin me rajonin e Ballkanit Perëndimor.
Projekt-rezoluta, e cila u prezantua për herë të parë në gusht të vitit të kaluar, mbështet stabilitetin demokratik dhe zhvillimin ekonomik në rajon përmes iniciativave për infrastrukturën, tregtinë dhe luftën kundër korrupsionit, duke përfshirë sanksionet për të penguar aktorët nga kryerja e aktiviteteve destabilizuese.
Projekt-rezoluta synon gjithashtu të përmirësojë bashkëpunimin SHBA-Ballkan për sigurinë kibernetike pas përpjekjeve keqdashëse të Iranit dhe Rusisë që synojnë vendet e Ballkanit Perëndimor.
“Ruajtja e paqes dhe forcimi i demokracisë në Ballkan është thelbësore për sigurinë dhe stabilitetin evropian, veçanërisht ndërsa lufta e Putinit në Ukrainë po vazhdon. Kjo rezolutë e propozuar dypartiake do të forcojë tregtinë dhe investimet midis SHBA-së dhe Ballkanit Perëndimor, do të ndihmojë në çrrënjosjen e korrupsionit, do të mundësojë vendosjen e sanksioneve kundër aktorëve destabilizues dhe do të dërgojë një sinjal të fortë dypartiak se Shtetet e Bashkuara janë të përkushtuara ndaj partnerëve tanë në rajon”, tha Shaheen.
Senatori Wicker theksoi se “pushtimi brutal i Ukrainës nga Rusia nënvizon rëndësinë e partneriteteve ballkanike.
“Miratimi i kësaj rezolute do të shërbente si një deklaratë e qartë, dypartiake e angazhimit të Shteteve të Bashkuara për të forcuar partneritetet tona diplomatike në rajon,” beson Ëicker.
Çfarë parashikon propozimi i rezolutës?
*Krijon një iniciativë për tregtinë rajonale dhe konkurrencën ekonomike, e cila do të mbështeste demokracinë, zhvillimin ekonomik dhe prosperitetin në rajon.
*Përcakton një nismë kundër korrupsionit që inkurajon Departamentin e Shtetit dhe Sekretarin e Shtetit për të ofruar asistencë teknike për çdo vend të Ballkanit Perëndimor në zhvillimin e një strategjie kombëtare kundër korrupsionit.
*Kodifikon dy urdhra ekzekutivë të SHBA-së që do të autorizonin sanksione kundër atyre që kërcënojnë paqen dhe stabilitetin në Ballkanin Perëndimor dhe që përfshihen në sjellje korruptive.
*Inkurajon partneritetet universitare dhe iniciativat rinore, inkurajon angazhimin e Korpusit të Paqes në rajon dhe kërkon që Korporata Financiare e Zhvillimit të hapë një zyrë të shpallur më parë në rajon.
*Njeh rolin kritik të sigurisë kibernetike në mbrojtjen e infrastrukturës kritike dhe kundër veprimtarisë keqdashëse, duke përfshirë Rusinë dhe Iranin. /tesheshi.com/
