Nga Blendi Gashi
Për ta ndaluar presidentin Thaçi që të negociojë me homolohun Vuçiç për territorin e Kosovës, opozita ka paralajmëruar se do të thërrasë seancë të jashtëzakonshme të Kuvendit para datës 7 shtator kur do mbahet takimi i radhës në Bruksel.
Shefi i grupit parlamentar të LDK-së, Avdullah Hoti ka paralajmëruar se në këtë seancë do të propozohet një rezolutë me një pikë të vetme të rendit të ditës, atë që askush nuk ka mandat që të negociojë për territorin e Kosovës.
Opozita është shprehur se do të kërkojë mbështetje nga grupet parlamentare të AAK-së dhe NISMA-s, pasi sipas saj opozitës, këto parti janë deklaruar kundër idesë për ndryshim të kufijve. Partia e Limajt ka konfirmuar se do marrë pjesë në seancën e thirrur nga opozita, pasi thotë se janë kundër që të diskutohet në Bruksel për ndryshim të kufijve.
Por kjo iniciativë e opozitarëve nuk i ka pëlqyer aspak kryeparlamentarit Kadri Veseli, i cili ka thënë se ndonëse proceduralisht është në rregull, “politikisht përbën një veprim absurd dhe krejtësisht të panevojshëm për temën të cilën thuhet se do ta trajtojë”.
Veseli ka goditur më tej opozitarët duke thënë se “sovraniteti dhe integriteti territorial i Kosovës, as dje, as sot, as kurrë, nuk mbrohet me deklarata elektorale dhe rezoluta eventuale, por nga institucionet shtetërore dhe nga kushtetuta e saj.
“Paniku opozitar dhe gënjeshtrat me të cilat partitë opozitare dezinformojnë qytetarët e Kosovës janë të turpshme dhe njëkohësisht të rrezikshme për stabilitetin e vendit. Ato kanë një qëllim të vetëm: të nxisin tensione dhe më pas protesta të dhunshme antidemokratike, në kundërshtim me rendin kushtetues dhe ligjor në vend”, ka theksuar kreu i Kuvendi.
Ja ç’thonë analistët për seancën e jashtëzakonshme…
Analisti politik Fadil Lepaja, seancën e thirrur nga opozitarët e sheh një thikë me dy teha për faktin se nëse dështojnë ta miratojnë rezolutën i japin Thaçit legjitimitetin për të biseduar për kufijtë.
“Nëse nuk arrihet, që përmes një rezolute të i kufizohet mandati presidentit që të bisedoj për territoret, kjo në njëfarë mënyre do të ishte dritë e gjelbër për presidentin edhe pse kushtetuta nuk e lejon një diçka të tillë. Sidoqoftë, koalicioni qeverisës, në njëfarë mënyre është deklaruar kundër dhe mbetet të shihet se si do të bëhen kalkulimet mes pozitës dhe opozitës. Nëse shkohet në votim, pa i pasur siguruar numrat, kjo do të ishte një hap i rrezikshëm”, thotë Lepaja për tesheshi.com.
Njohësi i rrethanave politike Faik Krasniqi, deklaratat nga opozita i sheh vetëm për konsum politik.
Ai thotë se nëse në Kuvend nuk miratohet rezoluta, opozita duhet të ndërmarrë veprime tjera për ta ndalur Thaçin.
“Ekzistojnë edhe mekanizma të tjerë si Gjykata Kushtetuese që hedh poshtë çdo marrëveshje eventuale të Thaçit që është antikushtetuese, por kjo Gjykatë ka të drejtë edhe ta shkarkojë nga posti i presidentit, ashtu siç ka të drejtë dhe mundet edhe Kuvendi i Kosovës. Kështu që ka shumë mënyra për ta parandaluar Thaçin, qoftë edhe me protesta gjithëpopullore të organizuara nga opozita dhe shoqëria civile. Sidoqoftë, nëse ndodh kjo marrëveshje e paralajmëruar mund të ketë pasoja në rajon dhe në gjithë botën, por Kosova mund të humbas shumë territor nga ky lloj korrigjimi, sepse Serbia nuk futet në marrëveshje të tilla pa dalë fitimtar!”, thotë Krasniqi për tesheshi.com.
